Willemstad – Maduro & Cuiel’s Bank e aña aki pa di tres aña konsekutivo ta duna Fundashon Kultural Seú Kòrsou un kontribushon importante pa kontinuá ku e trabounan di organisashon di tur e aktividatnan di Seú. Ku e kontribushon aki MCB ta demostrá ku e ta é Banko Amigu di nos kultura tambe. 2015 ta un aña grandi ya ku Seú ta selebrá 40 aña. Kuarenta aña di perseveransha inkondishonal manera e lema di e aña aki ta bisa. Seú ta fiesta di kosecha ku alabes ta un di e aktividatnan kultural hopi grandi di Kòrsou. Ora nos tende Seú no ta solamente e marcha di seú grandi djadumingu 6 di aprel, pero tur e aktividat kultural rondó di e fiesta di Seú manera entre otro: Maramentu di lensu, Kantadó Mayó, Reina Seu i hopi mas. Den 40 aña Seú a krese hopi. Generashonan ta pasa e balor di kultura pa otro i e importansia di plantamentu i kosechá tambe ta sigui krese. Tur aña un kantidat grandi di hóben ta partisipá na Seú i demostrá di un manera positivo nan talento, kreatividat i abilidatnan di liderazgo. Por ehèmpel maramentu di lensu ta un arte típiko di nos kultura. MCB ta kontentu ku Fundashon Seú Kòrsou ta hasi trabounan duru pa tene esaki bibu ku e kompetensia. Ta ku alegria gerensia di Maduro & Curiel’s Bank a tuma nota di e kantidat grandi di hóben ku sea a bishitá òf partisipá den e kompetensia di Kantadó Mayó aña pasá. E aktividatnan di Seú ta repartí di e siguiente manera: Djadumingu 8 di mart aktividat di Mara Lensu, di 10 pa 14 di mart Kantadó Mayó, djasabra dia 21 di mart elekshon Reina Seú, djadumingu dia 29 di mart elekshon Wela Seú, djaluna 6 di april Marcha Grandi Seú, djadumingu 12 di april Marcha di Simadan, djadumingu 19 di april Marcha Seú Banda Bou i djasabra 25 di april entrega di premio. Maduro & Curiel’s Bank ta invitá komunidat kompleto pa asistí na e diferente aktividatnan di Seú. Ta nos tur huntu ta engrandesé nos kultura.