WILLEMSTAD – E siman aki tur hürdó, ku ta traha duru pa nan negoshi keda kla, por a sera konosí mihó ku otro, pero topa tambe ku representantenan di e kontratista prinsipal CORE i e supkontratistanan ku a traha na proyekto aki, un ke otro den presensia di e tim di Sambil Curaçao bou di guia di e Gerente General Jonathan Cohen. Den un ambiente ameno i ku un dekorashon apropiá di e área, a anunsiá na e okashon aki ku konforme plan fin di e luna aki e kontratista lo entregá e promé fase di e proyekto mega aki. Ademas a para ketu na e anunsio anteriormente e siman aki di e manehadó di teater Cinemark – despues ku nan a skohe pa e provishonnan mas avansá riba tereno di pelíkula ku konosementu i konsentimentu di Sambil – ku na fin di mei awor nan lo habri nan portanan pa amante di pelíkula. A base di esaki tur hürdó tambe ta haña dos luna adishonal pa finalisá nan unidat. Pa hopi di nan e tempu èkstra aki ta forma un alivio grandi, pasobra apesar ku nan ta hasiendo tur esfuerso nan tabata teme tòg ku nan lo no tabata kompletamente kla pa fin di e luna aki. Esaki no ta kita ku kada hürdó por kuminsá ku su negoshi promé ku fin di mei pa por tèst tur kos i pa eliminá tur opstákulo, i tambe pasobra ya tin bastante moveshon di hende den e proyekto grandi aki. Pa Sambil tabata konta tambe ku nan semper a sali for di e punto di bista ku e shopping mall mas grandi di Kòrsou, aparte di e oportunidat nobo pa hasi kompra, no ta kompleto sin sufisiente elemento di dibertishon. E teater ta forma un parti masha importante aki den. Na tur e 10 sentronan komersial ku Sambil a konstruí anteriormente e teater a habri samsam ku sobrá, i esei lo ta e kaso tambe na Kòrsou. Awor Sambil ku partnernan ta trahando riba un programa di aktividat i festividat pa e apertura ofisial fin di mei awor kaminda tantu e hürdónan komo e klientenan por disfrutá plenamente.