Repartishon di tshirt lo ta djabierne entre 5or pa 8or

WILLEMSTAD – Despues di varios dia di preparashon I tambe benta di karchi, tur kos ta kla pa djadumingu proksimo e kaminata di SOV Brandweer tuma luga den e area di Otrobanda. Ya pa varios luna kaba, miembronan di SOV Brandweer a prepara un tremendo kaminata kual ta tuma luga djadumingu 8 di Mart proksimo, kuminsando for di mitar di 7 di mainta na sitio di parker outo di SVB.

Ruta di Kaminata

E kaminata lo bai tin 2 ruta, den kual publiko por skohe pa sea kana 5 of 10 KM. E ruta di 5 KM ta start na Parkeerplaats di SVB, pasa Pater Eeuwensweg, Eyck van Voorthuyzenweg, Roodeweg, Breedestraat Otrobanda I termina bek na Parkeerplaats di SVB. E ruta di 10 Kilometer ta pasa di Pater Eeuwensweg, Helmin Wiels Bulevard, I ta pasa na John F.Kennedy Bulevard, Area Piskadera, Helmin Wiels Bulevard, yega na rotonde Parasasa, drenta na Piscaderaweg, pasa Roodeweg, Breedestraat Otrobanda I termina tambe na sitio di parker di SVB.

Kaminata “estilo” bombero

Lokual semper ta great ta, ku SOV Brandweer ta purba pa laga tur persona ku ta partisipa den kualkier aktividat hanja un “toke”di lokual bomberonan ta hasi diario. Pa djadumingu awor esaki lo no ta eksepshon, na momentu ku nos ta drecha e ruta ku diferente bandera, kandela, vehikulonan di Brandweer I tambe klaro e awa pa baha e temperatura. Pa unikamente 12,50 e persona ku ta partisipa na e kaminata ta risibi su tshirt, ice-tea, awa, fruta I tambe un sopi na final. Huntu ku e eksperiensia uniko, na final tin oportunidat tambe pa un preis SPESIAL di hanja un masashi.

Benta di karchi

A sobra algun karchi pa e kaminata di djadumingu proksimo, Dia di Hende Muhe, na unda bomberonan ta invita komunidat kompletu pa ban kana, tene e kurpa den kondishon durante “Firefighters Walk 2015”. Karchinan ta optenibel djaweps hinter dia na Kazerne di Brandweer na Rio Canario i Kazerne di Brandweer na Mundu Nobo. Djabierne 06 di Mart di 5or pa 8or pm tin entrega di tshirt pa e kaminata. Djasabra si sobra karchi of tshirt lo reparti esakinan entre 5or pa 8or na ofisina di Brandweer na Roodeweg. SOV Brandweer kier yama un danki tambe na sponsernan di e kaminata kual ta Vanddis I Lovers, Martijn Trading, Fire Grill, Autocity, Inderson Advocaten, Ennia, emisoranan Curom, Girobank, Loop Curacao, ESO, Turkutin, Curacao Ports Authority, Banko Sentral, Flow, Danny’s Groceries, Selikor, Changes I tambe tur otro sponser ku di kualkier forma a yuda ku e kaminata di djadumingu awor. Na tur esnan ku ta interesa den karchi, por yama pa kumpra nan karchi/tshirt pa “Firefighters Walk”na 526-8505 of 522-9780. Djoin e kaminata I biba e eksperiensia di “Firefighters Walk 2015”.