Parke Tropikal ta kontinuá ku e tradishon di tur promé djasabra di luna

Willemstad – Djasabra 7 di mart Parke Tropikal ta kontinuá ku e eksitoso aktividat di tur promé djasabra di luna, Zoovie Picnic Night. Henter famia ta invitá pa bin ku nan klechi, klapstoel, kama di pushi i kòtnan i disfruta di un bunita pelikula di famia. Entrada general pa Zoovie Picnic Night ta 5 florin pa persona. Porta ta habri 7 or di anochi i e pelíkula ta kumisá mitar di 8 en punto. E pelíkula ta un sopresa i tin di haber ku bestia, naturalesa i ta apto pa henter famia. Por paga bo entrada pa Zoovie Picnic Night awor tambe ku Fun Miles. Ku solamente 250 Fun Miles bo por wak pelíkula riba big screen den airu liber. E kosnan dushi kustumbrá manera popcorn, frio frio, hotdog, frietjes, suikerspin tambe ta optenibel na preis di famia. Ta rekomendá un i tur pa bin ku un paraplu pa si awa spat un tiki. Zootique, e giftshop di Parke Tropikal, tambe ta habri pa bishitantenan ku ke kumpra un regalito òf rekuerdo. Parke Tropikal ta yama danki na Massive ku ta e kompania enkargá ku e imagen i sonido tremendo i limpi durante Zoovie Picnic Night. Pa e mayornan ku ta buska un aktividat divertido pa bai ku nan yunan Zoovie Picnic Night sigur ta un aktividat ku nos ta rekomendá. Pa famianan ku ke pasa ku un persona deshabilita, den rolstoel of ta rekerí kualke atenshon èkstra, tuma kontakto ku Parke Tropikal durante ora di ofisina na 737 01 88 i lo duna e atenshon nesesario. Pa reservashon di gruponan tambe por tuma kontakto ku e number di telefòn ariba menshoná. E aktividat di Zoovie Picnic Night a bira un tradishon. E fundashon ku ta manehá e parke ta hasiendo esfuersonan grandi pa mantené e parke operashonal i ta ku kontribushon di un i tur esaki ta posibel. No ta un sekreto ku e parke ta pasando den tempu difisil. Bishitando e anochi di pelíkula pa solamente 5 florin pa persona bo tambe ta sostené nos Parke Tropikal. Djasabra 7 di mart bin ku henter famia por disfruta di un pelikula na airu liber i alabes kopera na sobrvivensia di nos parke.