Registrashon ta tuma lugá kuminsando djabièrnè awó

KRALENDIJK, mart 2015: Un bes mas Digicel Boneiru ta patrosinadó mayó di e Special Olympics Walk A Thon; e kaminata aki ta tuma lugá tur aña i ta konta ku gran partisipashon. E aña aki e ta tuma lugá djadumingu awó, dia 8 di mart próksimo. “Un bes mas nos ta konta ku partisipashon masal di komunidat boneriano pa e kaminata aki ku ta dediká na rekoudashon di fondo pa atletanan spesial”, esaki di akuerdo ku Gerente General, sra. Rachel Brathwaite.  Por registrá djabièrnè awó na El Mundo Restaurant for di 5’or di atardi pa 7’or di anochi. Lo por registrá riba djasabra tambe for di 10’or di mainta pa 4’or di atardi. Karchinan di partisipashon ta kosta Usd $15,00 i ta inkluí awa ku fruta na e diferente stashonnan riba e ruta i unabes yega Rincon e partisipante lo risibí un kùp di sòpi i un desayuno. Partisipantenan por skohe pa kana for di e kasnan di katibu direkshon Rincon òf for di Stadion di Kralendijk pa Rincon. Otro opshon lo ta for di Bon Bida Gym pa Rincon. Tur esnan ku ke kana e ruta for di e kasnan di katibu direkshon Rincon por bai ku bus, esaki ta sali 4:45AM  for di stadion, djadumingu dia 8 di Mart.  Finalmente sra. Brathwaite ta komentá,”nos ta enkurashá tur nos klientenan pa partisipá- no únikamente ta manteniendo e kurpa den moveshon ku ta bon pa nos salú, pero ta aportá na un bon kousa tambe”. Resientemente Digicel a hasi entrega di materialnan di promoshon i di uso pa durante di e kaminata. Sra. Arlene Marselia Engelhart, direktor di Special Olympics Bonaire a bishitá direktor di Digicel Boneiru, sra. Rachel Brathwaite pa tuma esakinan i asina kuminsá prepará pa e kaminata di djadumingu awó.