Willemstad – Un workshop di Dynamic Mooring i Metoceanic Analysis pa e di dos pir pa megakrusero a tuma lugá na ofisinanan di CPA ku representantenan di Svasek Hydraulics i KRVE dia 24 i 25 di februari 2015. E meta tabata ta pa e kompania averiguá si e datonan ku ya kaba a kompilá i tèst den simulashon di computer ta kuadra ku kondishonnan di bida real, i tambe pa optené feedback di esnan ku ta laborá riba e pirnan, botonan di tou, i loods. Durante e workshop, nan a topa havenmeester, loodsnan di CPO, representantenan di Kompania di tou Kòrsou (KTK), i otronan di kual nan trabou ta relashoná ku maramentu di barku. Puntonan ku a chèk ta posishonamentu di ‘dolphin’, kabuya i fènder pa maramentu, i tambe tamaño mínimo i máksimo di barku. Tambe a bishitá e megapir aktual i e área kostal kaminda e di dos pir lo ser konstruí. “Nos ta progresando ku e trabou preliminario ma súmamente importante ku lo yuda nos konstruí un pir di kalidat haltu kaminda nos lo por akomodá e kruseronan di mas grandi”, asina Minister di desaroyo ekonómiko di Kòrsou Stanley M. Palm a bisa. Svasek Hydraulics lo finalisá nan investigashon denter di e lunanan binidero.