WILLEMSTAD –  “Nos ta den gran espektativa, ya tur hende sá ku Renaissance Curaçao Resort ta kas di artistanan internashonal, sigur si ta trata di nan presentashon aki na Kòrsou. Pa e próksimo lunanan nos hotèl lo ta den un ambiente tropikal na unda ku e ritmonan kayente manera salsa, bachata i merengue lo trese tur hende den ambiente pa e festival den luna di Mei próksimo. Durante di e popular ‘happy hour’ den Rif Fort sigur lo hinka tur hende den ambiente”, esaki di akuerdo ku representante di Renaissance Kòrsou, sra. Karen Felida. Renaissance Curaçao ta perfektamente ekipá pa por akomodá e artistanan di taya ku lo ta bishitando Kòrsou pa e festival ‘Viva La Musica Latina’; por suprayá e diferente opshonnan di relahamentu e.o e Bapor Beauty Spa, Infinity Beach i e oportunidat di rekreashon. Ademas di esaki Renaissance Curaçao Resort ta konosi pa su ‘Fine Dining’  i hasi kompra den establesimentunan ku ta di primera kalidat. Tin hopi di hasi den e área di Renaissance Resort, Carnaval Casino i Rif Fort. Pueblo di Kòrsou mester keda pendiente ya ku lo tin algun kampaña pa kompañá e trayekto di promoshon na kaminda pa “Viva La Musica Latina Curaçao 2015”. “Nos ta gradisí e organisashon di Showbizz International pa skohe Renaissance Curaçao Resort. E festival aki sigur lo kontribuí na turismo di Kòrsou, pues no por keda sin demostrá gratitut i deseá e organisashon hopi éksito pa luna di Mei benidero. Pa e fin di siman di 29 ku 30 di Mei, Renaissance Curaçao Resort lo ta anfitrion di crew members, músikonan i artistanan ku lo presentá durante di e festival ‘Viva La Musica Latina’”, asina sra. Karen Felida a tèrminá. Tokante  “Viva La Musica Latina Curaçao 2015”: Lo tin riba esenario durante di dos anochi, shete artista. E konsierto lo tuma lugá riba lugar di parker di Sambil riba e anochinan di 29 ku 30 di Mei próksimo. Artistanan ku lo presentá: Olga Tañon, Alberto Barros, Gilbero Sta. Rosa, Jose Alberto El Canario, Gran Combo de Puerto Rico, Jorge Celedon i Guaco. Riba ámbos anochi e konsierto lo kuminsá 7:30PM. Entrada ta stipulá na 350 florin pa tur 2 anochi i 200 florin pa kada anochi respektivamente, esei pa tur esnan ku no ta deseá di kumpra un pakete di 2 anochi.