WILLEMSTAD — Instituto pa Formashon Musikal I Amak ta sumamente satisfecho ku e logro  di e hóbennan ku ta forma parti di dos orkesta di Junior All Star pa nan  presentashon durante festival di tumba hubenil i marcha di mucha 2015. Ta algu históriko ku e hóbennan durante un preparashon intensivo bou di direkshon di nan dosente Gedion Chandler i  e dosentenan di kanto, por a logra ku e hóbennan a kompañá 14 komposishon nobo di kanto i a interpretá areglonan difísil di areglistanan, manera, Gedion Chandler, Toro Colina, Gregory Colina, Borel Dopwel, Titi De Palm, Dibo Doran i otronan den un forma ekselente. Por fin nos areglistanan a laga e hóbennan kanta i toka areglonan na nivel musikal haltu. E stap pa penetrá den tumba grandi ta bira mas kòrtiku. E hóbennan ku ta forma parti di e dos orkestanan Jnnior, ta prosedente di  18 bario rònt Kòrsou, i na ta haña lès semanalmente di 25 dosente músiko. Hopi reakshon positivo a drenta di parti di músikonan, prensa i pueblo di Kòrsou,  pa e nivel musikal di e hóbennan, lokual ta algu masha  agradabel pa tur esnan ku ta elaborá den e proyekto aki. Instituto pa Formashon Musikal ta gradisí  e organisashon Meo tambe pa e konfiansa ku nan a depositá den  e proyekto musikal aki, pa laga Junior All Star keda enkargá ku e  kompañamentu di tur 14  partisipantenan di tumba hubenil. Kòrsou por ta sigur ku tin un bon relevo musikal pa futuro, pa festival di tumba i pa músika en general na Kòrsou. Un palabra di gradisimentu ta bai, na MCB, Samenwerkende Fondsen, Reda Sosial i Core NV. Danki tambe na tur Branding partners, i sponsersnan manera Multipost, Coca Cola, General Catering, Spa di Licores Maduro,  AutoCity i tur medio di publisidat. UN pabien spesial na tur 14 partisipante. Ta bon pa mesora koregí e sekuensia ku ta aparesé riba e CD, ku esun enkargá ku e produkshon no a haya korekto. E 7 partisipantenan ku a pasa pa final ta konforme e siguiente sekuensia:

Kantante                                              Komposishon

1.Denzel Gregg                                    Pinocchio

2.Denzel Mercelina                             E pòtlot misionero

3.Rendrick Djaoen                              Lus riba nos lugá

4.Shentily Zimmerman                       Ban lanta Kòrsou

5.Charelson Mercelina                        Karnabeha

6.Tarique Martinus                             E ambiente di den kaya

7.Tiffany Celestijn                               Karnaval su fantasia