Willemstad – Alumnonan di Sta. Rosa de Lima skol a gosa un bòl ayera ora ku DJ Argenis Huerta a animá e selebrashon di karnaval na e skol danki na CIBC FirstCaribbean. Pa di tres aña konsikutivo, CIBC FirstCaribbean a organisá un kompetensha entre skolnan di fundeshi ku e chèns pa nan gana animashon di e popularisimo DJ Argenis Huerta pa toka i animá nan selebrashon di karnaval na skol.  E 200 alumnonan di Sta. Rosa de Lima skol a gosa i baila riba e tono di Pinokio, e tumba hubenil ganadó di e aña aki. “Nos muchanan no por a gosa nan selebrashon di karnaval na skol mihó.  Nos a bira masha kontentu ora nos a tende ku nos skol a gana e premio, ofresé pa CIBC FirstCaribbean, ku ningun otro mas ku DJ Argenis Huerta pa animá nos fiesta na skol.  Nos ta yama danki na CIBC FirstCaribbean pa duna nos muchanan momentunan inolvidabel.” Sra. Nieuwkerk, kabes di skol di Sta. Rosa de Lima a bisa. Lysaira Ortela di CIBC FirstCaribbean a bisa, “Karnaval, tur aña di nobo, ta saka e mihó for di kada un di nos.  E ta siña nos e.o. pa kolaborá, uní i ser kreativo.” Ortela a sigui bisa “CIBC FirstCaribbean pa e motibu aki ta komprometá pa stimulá nos muchanan pa gosa di krnaval den un ambiente natural pa nan.  Ki mihó luga ku na skol i ku animashon di un di e mihó DJ nan di Kòrsou.  Nos a gosa mira e muchanan, tur potenshal karnavalista pa futuro, baila riba tono di Pinokio.”