WILLEMSTAD, Kòrsou:  Manera ku ya kaba ta bon konosí, den luna di Mei próksimo Kòrsou lo konosé su promé konsierto di género musikal latino ofresiendo un line-up impreshonante di artistanan ku lo ta huntu riba un solo tarima, inkluyendo Olga Tañon, Gilberto Santa Rosa i muchu mas. Miéntras ku djabièrnè último a habri e oportunidat pa fanatikonan hasi uso di krédito pa kumpra nan karchi via di Norsa N.V., awòki ta fasilitá e fanátiko internashonal ku ta pendiente pa bishitá Kòrsou pa presensiá e konsierto tambe. Karchinan ta ‘online’ via di www.ticketscaribbean.com pues hopi fásil pa e kliente ku ta residensiá den eksterior, partikularmente esnan na islanan bisiña. Ta premirá un gran kantidat di fanátiko for di Aruba i Boneiru, sin lubidá Isla Ariba i Sürnam. Nan por kumpra nan karchi ‘online’ pa e mesun preis ku ta wòrdu bendí lokalmente Naf 200 / $115 pa un anochi òf Naf 350 / $200 pa tur dos anochi. Atkisishon di e karchi ta hopi fásil; paga, print e-ticket i bin kuné riba e anochinan di konsierto.  Pa mas informashon tokante di Viva La Musica Latina por bishitá e página di Facebook òf por yama +5999 737.2025 ext. 135. Keda pendiente pa algun kampaña interesante riba e página di Facebook di Viva La Musica Latina.