Despues di un reunion eksitoso aña pasá ku a trese hopi rekuerdo agradabel, a petishon komishon organisadó lo tene un reunion mas grandi ainda dia 22 di febrüari próksimo. E dia aki tur èks alumno di e skol en kuestion ta bonbiní for di 2or di mèrdia. Eks dosentenan tambe lo akudí na e enkuentro. E komishon organisadó, konsistiendo di algun alumno na Kòrsou i Hulanda, a logra deliberá ku direktiva di skol i konvensé su miembronan pa laga e skol ta esenario e dia aki, esta djadumingu 22 di febrüari. Amador Nita Mavo lo bai bèk den tempu i rekordá kuantu momentu agradabel tur hende a pasa i kompartí ku otro. For di den oranan trempan ta organisá e.o un partido di softball entre èks alumnonan di AMN i St Jozef Mavo. Algun dosente di gymnastiek konsistiendo di e.o Mr Persaud  tambe lo tei pa guia un par di ehersisio manera tabata hasié tempunan ayá. Algun klas tambe lo ta habrí, kaminda dosentenan di antes lo tei presente. Eks alumnonan por drenta i kai sinta atrobe den banki di skol. Tin un bar ku kushina bon surti. Mas atardi lo klousurá e dia ku un programa sorpresa masha agradabel mes. Asina ta, èks alumno di Amador Nita Mavo: marka e fecha 22 di febrüari den bo agènda pa e biaha aki sí bo no pèrde nada. Pa mas informashon por yama na telefon 5604632 o E mail: komishonanm@gmail.com. Ban skol bèk djadumingu 22 di febrüari na Amador Nita Mavo!