WILLEMSTAD, Kòrsou:  Djabièrnè último Norsa N.V. i Showbizz International B.V a firma un akuerdo di kolaborashon. Esaki ta enserá ku Norsa N.V. lo tuma na su enkargo a base di eksklusividat bendementu di karchi di entrada na krédito pa e konsierto “Viva la Música Latina Curaçao 2015”.  Norsa N.V. ta un kompania di famia, fundá na yanüari 1999 ku e meta di parti bòn entre su dilernan, loke ta fasilitá nan klientenan pa kumpra merkansia na krédito. Norsa N.V. ta un di e mas grandinan den e negoshi di parti bòn. Di akuerdo ku sr. Steve Hudson di Showbizz International B.V “Riba petishon di vários persona ku a aserká nos organisashon i a mustra interes pa asistí na e evento, pero a la bes a pidi pa bini ku un vehíkulo ku fasilidat di pago na kuota, nos a aserka Norsa N.V. No solamente e dilernan di Norsa N.V. lo bende karchi, pero si un persona ta deseá, e por akudí na Norsa N.V. i kumpliendo ku un registrashon e por kumpra su karchi di entrada pa e grandioso konsierto “Viva la Música Latina Curaçao 2015” na krédito”. Norsa N. V. ya bon konosí den nos komunidat tin su ofisina na Kaya Acacia 28 telefon 767 1563 i na Punda telefon 461 4810. Riba foto por mira Sra. Noralise Polonius i Sr. Steve Hudson firmando e akuerdo. Asina e dos kompanianan akí ta brindabo oportunidat di kumpra bo karchi di entrada pagando na kuota p’asina tur hende por disfrutá di e gran konsierto “Viva la Música Latina Curaçao 2015” den luna di Mei próksimo.