…Kòrá ku un tiki bèrdè…

WILLEMSTAD-SEPT: “Nos ta kere firme den liderazgo dor di duna un bon ehèmpel- pone akshon tras di palabra. Pa algun tempu kaba nos ta kontemplá pa redusí gastunan di elektrisidat i di duna un aporte na nos medioambiente. Nos ta asina leu ku a hasi instalashon di e panelnan solar na nos edifisio”, esaki di akuerdo ku Sr. Sander Gielen, CEO pa Digicel Caribe Ulandes. E panelnan solar a keda instalá na banda di e edifisio, parti patras i riba dak, esaki lo kondusí na un redukshon enorme den gastunan di elektrisidat i ademas di esei nos ta minimalisá e kantidat di CO2 ku ta keda mandá den nos atmòsfera . Di e forma aki Digicel te generá energia for di un fuente renovable. Pues, ta kontribuí na un aire mas limpi. Ademas di esaki Digicel, a kambia e lusnan ku ta wòrdu uzá parti paden i pafó di nan edifisio; ántes tabata uza lusnan fluorisente i halogeen, awor aki tur a wòrdu kambiá pa ‘LED lights’. Otro práktikanan ku e kompania tin ta e maneho di ‘air conditioning’; tur esakinan lo wòrdu kambiá pa un sistema di ‘inverter’. E práktikanan aki no ta keda únikamente na e invershon di parti di e kompania pa atkerí sistemanan nobo, sino tambe den un kambio di mentalidat serka nan empleadonan. Esaki mes ta hasi, ku Digicel ta duna seshonnan informativo na nan empleadonan i ta pèrkurá pa duna nan ‘tips’ riba kon pa minimalisá e gastunan di elektrisidat serka nan mes na kas tambe. Den ofisina Digicel ta konsientisá empleadonan pa paga lus, lèptòp i kòmpiuter ora ku bai kas, òf ora ku esaki no ta nesesario. Pa realisá e proyekto aki, Digicel por konta ku ekspertisio di Eco Energy i Omni ku tin amplio eksperensia den ehekushon di proyektonan di e magnitut aki. Riba foto athuntu, por haña un impreshon di instalashonnan ku ya kaba a wòrdu hasí na edifisio di Digicel na Biesheuvel.