WILLEMSTAD – febrüari 2015 e hóbennan di MANERA MI BOS NO TIN DOS a finalisá e tayer di kontenido presentá pa Fundashon KPEK den forma di un eksposishon. Den ouditorio di Biblioteka Nashonal Kòrsou e partisipantenan a duna un tremendo presentashon ku a ilustrá desaroyo i diferente dilema di e ocho metanan di Nashonnan Uní. Durante e anochi aki tabata tin diferente persona prominente di den nos komunidat presente ku a sa di trese algun palabra di motivashon i tambe nan opinion tokante e kontenido i e manera ku e gruponan a presentá. Representando Fundashon KPEK nos tabata tin e plaser di por tin Mr. Errol Cova i Sra. Marbella Felipa presente. Tambe di nos Parlamento nos por a konta ku sosten i presensia di dr. Marilyn C. Moses i tambe Mr. Hensley F. Koeiman. Ta asina ku e hóbennan ya a risibí lès di Speech Craft serka klupnan di Toastmasters International i Papiamentu serka yùfrou Charlene Merite (MIL). Awor ku a termina ku e parti di kontenido mesora nos ta sigui ku e parti preparativo kaminda tur partisipante ta traha riba nan abilidat di debate. Di e forma aki nos tin sigur ku nan por duna lo maksimo di nan mes durante e kompetensha di debate. E kompetensha di debate ta tuma lugá den luna di mart na e sitio ofisial di e proyekto ku ta Biblioteka Nashonal Kòrsou kaminda pueblo di Kòrsou ta bonbiní.