Desaroyonan den e delaster kuartal di 2014 ta forma un base positivo pa 2015

Willemstad – E resultadonan di tráfiko di biahero den e di 4 kuartal di 2014 ta mustra e kresementu ku Curaçao Airport Partners (CAP) a premirá, kual ta basá riba un kresementu di +5% pa loke ta kapasidat di asiento den e kuartal. Durante e di 4 kuartal 2014 e total na biahero a subi ku +3% kompará ku e resultadonan di e di 4 kuartal di 2013. Tantu biahero ku ta yega i sali internashonal a subi durante e di 4 kuartal 2014 kompará ku e mesun kuartal den 2013 ku respektivamente un impaktante +13% i +8%. Biahenan domestiko, pues esnan entre e islanan Karibe Hulandes, a baha ku -10% kompará ku e di 4 kuartal den 2013. E kantidat di biahero di transito, pues e biaheronan ku no tin Kòrsou komo nan destinashon final, a baha ku -20% kompará ku e di 4 kuartal di 2013. ArkeFly a  introdusí e di dos avion Dreamliner riba e ruta Amsterdam, KLM a lansa 2 buelo semanal adishonal for di Amsterdam enfoká riba e merkado Aleman i jetBlue Airways a inougurá e servisio for di New York aeropuerto JFK. Insel Air a kuminsa duna e servisio pa Port of Spain atrobe tres bia pa siman i a inougurá e servisio di Georgetown ku ta bula 2 bia pa siman. Europa ketu bai ta nos merkado mas fuerte i a krese durante e di 4 kuartal di 2014 ku un subida di +16% na biaheronan ku ta sali kompará ku e di 4 kuartal 2013. E merkado di Nort Amerika a baha den e di 4 kuartal 2014 kompará ku e di 4 kuartal di 2013 ku -2%. E bahada ta dor di e biaheronan di tránsito di Venezuela for di Miami via Kòrsou. No opstante ku e servisio for di JFK a ser lansá den Desèmber i e servisio di charter di Canada a kuminsá fuerte, ambos impakto no por a nutralisá e bahada kousá dor di e merkado transito for di Nort Amerika. E merkado di Merka Latino a baha durante e di 4 kuartal 2014 ku -2% kompará ku e di 4 kuartal di 2013; e ekonomia i e situashon polítiko na Venezuela tabatin un impakto severo riba e sifranan, kual ta mustra ku e sifranan di Caracas i Valencia a baha respektivamente ku -27% i -10% kompará ku e mes un kuartal den 2013; e tráfiko for di Aruba a baha ku -15% durante e di 4 kuartal 2014 kompará ku e di 4 kuartal di 2013, kual ta sugerí ku kompetensha limitá i tarifanan haltu posiblemente ta influenshá e biahenan rekreativo entre e islanan.

Tráfiko aereo 2014 ta reflektá kon delikado e merkadonan klave ta
E total na movementu di biahero den 2014 a baha ku -3% kompará ku 2013. Salidanan domestiko, pues pa e islanan den Karibe Hulandes, a baha ku -10%  kompará ku 2013 i biaheronan di tránsito, pues esnan ku no tin Kòrsou komo destinashon final, a baha ku -25% kompará ku 2013. Kòrsou a logra mantené servisio aereo na Europa, Nort Amerika, Merka Latina i Karibe Hulandes i na mes momentu a diversifiká e servisio di Europa, Estados Unidos i a oumentá kapasidat di stul for di Europa, un ruta nobo di Estados Unidos i rutanan nobo for di Merka Latina. Europa, e merkado di tráfiko mas grandi pa Kòrsou, a krese ku 9% durante 2014 kompará ku 2013. E kresementu a ser stimulá ku un kresementu di 7% di kapasidat di stul for di Amsterdam. E merkado di Nort Amerika a baha ku -11% durante 2014 kompará ku 2013. E impakto riba e tráfiko a ser kousá dor di e situashon volátil di Venezuela i un bahada di -20% di kapasidat di stul for di e momentu ku DAE a bai bankrut den 2013. E merkado Latino Merikano a baha ku -8% durante 2014 kompará ku 2013 i e merkado Venezolano volátil ta sigui tin un impakto riba e turismo di estadia. E merkado Hulandes Karibense a baha ku -10% durante 2014 kompará ku 2013 dor di un bahada di biahenan rekreativo entre e islanan. “2014 Generalmente tabata un aña ku hopi reto den nos resultadonan di servisio aereo, pero nos ta kontentu i enkurashá ku e resultadonan positivo den e di 4 kuartal, i salvo algun komoshon ekonómiko signifikante riba nivel global, nos ta spera un tráfiko di biahero mas sólido den 2015”, Ralph Blanchard, CEO di Curaçao Airport Partners, ta indiká. “E hecho ku nos a logra mantené, diversifiká, oumentá kapasidat di stul i inougurá buelonan nobo, tin nos entusiasmá i sperando un 2015 fuerte”, Blanchard a kontinuá na bisa. “Ku un bon entendimientu di nos potenshal pa ku e desaroyo di servisio aereo, i nos  interakshon i relashon ku kompanianan di aviashon internashonal i regional fihá riba un base solido, nos lo sigui traha den estrecho kolaborashon ku nos partnernan den turismo CTB i CHATA pa desaroyá un maneho sinergétiko pa optimalisá e demanda pa e destinashon i  tambe sigui traha pa proveé un produkto di hospitalidat superior pa nos bishitantenan”.