Skol di deporte Medina Grappling lo duna inisio, kuminsando djasabra awó na lèsnan di kickboxing pa tur hende di 14 aña bai ariba. E lèsnan di kickboxing duná dor di Glenda Poeder lo ta riba tur djasabra for di 09:00 a.m te ku 10.30 a.m- pa hende hòmber i muhé huntu. E idea ta pa den futuro ofresé 2 lès pa siman. E lèsnan (training) ta un meskla di kickboxing, bòkseo i téknikanan di Muay-Thai ku ta wòrdu praktiká riba skòp- i/òf kusinchi òf huntu hasiendo uzo di glòf i protekshon di rudia. Durante di e lèsnan lo pone atenshon riba téknika i banda di esei lo praktiká ku otro p’asina ekstendé e reakshon (sensibilidat) di kada partisipante.  Tambe e entrenamentu ta kontené un kalentamentu intensivo ku ta enfoká riba kondishon i tambe riba forsa di kurpa. Pa e atletanan di deporte marsial ku ta deseá di pasa dor di e material tékniko i mehorá nan kondishon aun mas, lo tin un bes pa luna un training ‘pika’ den aire liber na diferente sitio na Kòrsou. Pa personanan sin eksperensia ku kickboxing – e ta un deporte marsial ideal, relashoná ku defensa propio, kondishon físiko i forsa, disiplina, perseveransia i aprendisahe riba defensa kontra- i rèspèt pa bo kontrinkante.  Pa atletanan di Medina Grappling-  entre ‘grappling’ (kue tene) i Jiu Jitsu brasilero (BJJ)- kickboxing ta kompletá e entrenamentu pa di e forma ei siña téknikanan riba pia tambe. E entrenamentunan lo wòrdu duná manera previamente menshoná dor di Glenda Poeder, un dosente ku mas di 25 aña di eksperensia den deporte marsial- di kual gran mayoria den bòkseo i Muay-Thai (faha pretu). Pa esnan ku ta interesá por partisipá na un lès di introdukshon, esaki ta kosta 15,00 florin. Komo partisipante di e lèsnan di kickboxing ta obligatorio pa hasi uzo di protekshon di boka i bènsu (verbant). Na sitio di e entrenamentu por fia glòf i protekshon di rudia. Pa mas informashon por yama 527.2746 / 698.4891 òf bishitá e websáit www.medinagrappling.com Medina Grappling ta situá na Orionweg 5A, Zeelandia