Yanüari, 2015 – WILLEMSTAD:  Pendiente pa inskripshon di Festival di Tumba djadumingu awó, KFC, Subway i Pizza Hut ta bolbe  pone su skouder bou di e magno evento ku ta pendiente pa tuma lugar na fin di yanüari próksimo. “Nos ta mashá orguyoso di por sostené e proyekto aki, pa algun aña kaba Asosashon di Músiko Kòrsou por konta ku e patrosinio di nos restorantnan. Komo branding partner di Festival di Tumba nos ta satisfecho ku e trabou ku henter direktiva di AMAK a bin ta hasi pa no únikamente promové e festival pero, engrandesé tambe. Meskos ku aña pasá, e aña aki KFC, Subway i Pizza Hut lo duna su klientenan aun mas ‘balor’ pa nan karchi di Tumba”. esaki di akuerdo Sr. Randy Maurera. KFC, Subway i Pizza Hut lo tin diferente spesial pa e temporada aki, tambe klientenan por spera ku tur tres restorant lo wòrdu bon representá den Curaçao Festival Center (CFC) repartiendo diferente artíkulo promoshonal i ofresiendo klientenan oportunidat di gana premionan atraktivo. KFC i Pizza Hut lo tin promoshonnan durante di henter e temporada di karnaval. Klaro, miéntras ku ta disfrutá di e tumbanan riba e anochi di 26 pa 28 di yanüari i e gran final riba 30 di yanüari, por disfrutá tambe di tur e faboritonan di Subway i Pizza Hut den CFC. “Nos partnership no ta únikamente ku Festival di Tumba, pero ku kultura di Kòrsou den su totalidat. Den kultura un pais ta konosé ekspreshon i desaroyo. E kresementu di Festival di Tumba ta bai pareu ku e desaroyo kreativo di nos komunidat. Festival di tumba den transkurso di tantu aña a krese i bira un produkto ku Kòrsou por ta hopi orguyoso di dje. Pa e por sigui desaroyá i produkto musikal mester hasi invershonnan den e festival. Sin aporte i kontribushon di patrosinadónan e espasio pa hasi invershon den e festival ta limitá! Esaki mes ta un di e motibunan pa kual nos ta pone skouder bou di e proyekto aki. Nos ‘partnership’ ta konfirmashon ku nos ta kere den nos kultura, nos tin konfiansa den nos hendenan i e produkto lokal ‘tumba’ ”, asina Randy Maurera a finalisá bisando. KFC, Subway i Pizza Hut ta deseá tur músiko, kompositor i areglista ku ya kaba ta den preparashon hopi éksito i ta invitá pueblo di Kòrsou pa akudí masalmente na CFC i disfrutá di Festival di Tumba 2015.