ORANJESTAD, Aruba – 9di januari 2015: E yate “Big Papi” di George Metry tabata e centro di atencion na Fuikdag 2015 na Corsou cu un ambiente fenomenal cu musica di e conocido DJ di Aruba “NutzBeatz”. Abordo di e yate “Big Papi” tabatin entre e invitadonan, artistanan y deportistanan conoci manera Andrew Jones, kende no ta falta ni un Fuikdag abordo di Big Papi. Amigonan di NutzBeatz, esta Sunnery James y Ryan Marciano, Jerry y Rubin di The Partysquad, Maarten Schakel y Alex Sargo, a percura pa un tremendo sorpresa pa esunnan gosando di e dia, cu presentacionnan espontaneo riba e yate. Fuikdag ta masha conoci na islanan ABC y tabata un Arubiano, esta Eduardo “Catuna” Croes (den feliz memoria) kende a cuminsa riba su boto “Big Y” cu e tradicion di pone speakers y dj-nan riba su boto pa pone ambiente na Fuikdag. Esaki a haci cu Fuikdag ta grandi manera e ta awe. E aña aki abordo di e yate Big Papi, amigonan y famia a tene un minuut, no di silencio, pero di aplauso y aclamacion pa rindi homenahe na nan bon amigo Eduardo Croes. Fuikdag tabata un biaha mas inmensamente exitoso, cu bon ambiente y hopi druk. NutzBeatz ta gradici Tio George Metry pa e bon trato di semper y pa e honor di por a forma parti di e festividad aki y e dedicacion na Eduardo Croes. NutzBeatz a laga sa for di awo caba cu e lo t’ey sigur otro aña atrobe. Eldrick Boekhoudt (Nutzbeatz), naci na Aruba, a crece y bira e DJ di musica electronico mas grandi den Caribe Hulandes, cu varios presentacion haci den paisnan Latino Americano (specialmente Venezuela), na Merca, Corsou, Chile, Boneiro, y mas. Na aña 2013 el a firma cu Dirty Dutch y awor ta forma parti integral di e grupo aki, haciendo presentacion den region Latino Americano. Ya caba el a toca cu DJ nan grandi manera DJ Chuckie, Sunnery James, Ryan Marciano, Nero, Erick Morillo, Hardwell, Fatboy Slim, Dimitri Vegas, Sidney Samson, Afrojack, Shermanology, Nicky Romero y asina por sigui menciona. Tambe el a toca entre algun di esunnan di mas grandi di musica electronico na Mystery Land na Chile y Electric Festival na Aruba, entre otro.