Manera kustumber for di  1982, tur aña Asosiashon di Músiko i Artista di Kòrsou ta dediká Festival di Tumba na un òf mas baluarte ku durante su trayektorio a nifiká hopi pa engrandesé Festival di Tumba. Pa skohe un òf mas baluarte Direktiva tin biaha a proponé sala un òf mas kandidato òf  di parti di miembronan mes, a bini proposishon di un eventual kandidato(nan). Realidat ta ku ta tuma e desishon final durante reunion general. E aña aki prensa, ku semper ta hopi agresivo den notisia relashona ku nos gran festival di tumba, a spekulá ku Festival di Tumba lo ta dedika na sierto personahe. Riba su mes esei no ta nada malu. Pero e ta trese konfushon bou di miembronan ku ta na altura kon e prosedura ta bai. I ta pesei durante reunion general a diskuti e  situashon aki i  a pidi miembronan di prensa pa tene kuenta ku e forma ku miembronan ta usa pa yega na e ekoho. Punto di salida pa yega na e nombramentu ofisial ta ku e persona o instituto por ta un músiko òf un persona òf instansia ku di un òf otro forma ta relashoná  ku Festival di Tumba. Pues un músiko, persona òf instansia ku a hasi hopi riba tereno musikal pero ku no ta direktamente relashoná ku Festival di Tumba, no ta bini na remarke pa risibí e honor aki. Mayoria biaha, ora ta trata di un persona, ta skohe pa duné e honor aki na bida. Den e kaso di aña pasa esei no tabata e kaso ya ku e kuater personahenan, di felis memoria ku a haña e honor póstumo, tabata hendenan hopi yegá na Festival di Tumba pero ku lamentablemente diripiente a pasa pa mihó bida. Pa loke ta e aña aki, manera kustumber direktiva a presentá algun nominado i finalmente den forma unánime reunion general, esta miembronan, a disidí ku ta dediká Festival di Tumba 2015 na : DIREKTIVA DI AMAK