Djasabra ultimo na Saint Tropez a tuma lugá e presentashon ofisial di e Music Video “Better Man” di e artista hoben Andrew Aalse. E ambiente tabata ameno i e espektativanan, konosiendo Andrew i su tata Dennis Aalse tabata bastante haltu. Entre e invitadonan spesial tabatin miembronan di prensa, kolega kantante i musikonan di diferente agrupashon musikal, i e cast kompleto di e musical “Les Misérables”. E públiko presente tabata  hopi ansioso pa e revelashon tuma lugá. Maestro di ceremonia Kevin Carty a hasi apertura di e anochi di un forma ilustrativo, komparando nos talentonan riba tereno deportivo ku Kòrsou (t)a kere den dje i ku ta sumamente eksitoso den nan deporte. Su mensahe na final tabata: ban kere den nos talentonan local riba tereno di músika i ARTE en general tambe. Pasobra nos isla tin hopi talento i nos mester kere den nan pa nan por logra! Andrew Aalse ta un di e talentonan ehemplar ku nos tin. E ta sin duda un ehèmpel bibu di un persona ku un soño grandi. I ku a pone komo meta pa e logra su metanan. Su mayornan Tessa i Dennis Aalse ta kere den dje i nan a para semper su tras i meskos awor tambe nan ta pará 100% tras di su ambishon i su eskoho pa traha na su karera artístiko. Despues di introdusí Andrew na e públiko, Kevin Carty a para ketu un ratu asina na e produkshon di e Music Video “Better Man”. No a laga e preséntenan den suspenso largu mas; e resultado final, grabá na New York a pasa riba screen pa tur hende por a gosa di dje. Andrew a kaba di impreshoná e públiko e anochi ey ku Better Man live, kaminda e por a yena ún i tur presente ku su energía positivo di semper. E Music Video a haña bon akohida bou te ainda i tin tur ingrediente pa deleitá nos fanatikonan di bon músika. Ku hopi orguyo Andrew i henter su team ta presentá e resultado final na Kòrsou i mundo kompleto:  Better Man – http://youtu.be/HguOM2h65tc Komposishon di letra i melodia: Andrew Aalse Areglo: maestro Dennis Aalse Grabashon & mixing: Jerrel “Jègo” Paula Produkshon:  ISLAND BREEZE AFFILIATES bou di enkargo di Glen Barcley – ku Chris de Geus komo hoben producer Yu di Kòrsou Director: Max Sainvil di New York Graphic Design: Harlan “Boy-C” de Haas