Sr. Dito de Kort; “Un kompromiso ku tin 25 aña riba pia”

WILLEMSTAD, Kòrsou- Desèmber 2014; Tabata djasabra último ku Banco di Caribe a renobá un kompromiso di años ku nan tin ku Westpunt. sr. Dito de Kort, a yama tur hende bon bini den nòmber di banko i tambe ENNIA. Den su palabranan di bon biní, sr. de Kort a referí na e kompromiso ku e kompanianan tin ku e piskadónan di e área di Westpunt i kon esaki ta ekivalente na e solides di e pir. Na aña 1989, Banco di Caribe  a laga konstruí e pir aki pa yuda e piskadónan ora di karga i deskargá nan boto. Den transkurso di e añanan, laman di Zùit Wèst a suta e pir, pero e ta konstruí di tal forma, ku ketu bai despues di 25 aña e ta pará- sólido, riba su kurpa. E pir di Playa Grandi ta soportá laman brutu; p’esei semper Banco di Caribe a pèrkurá pa su mantenshon. Algun luna pasá, a konstatá ku e nivel di  laman a subi- pa motibu di esaki Banco di Caribe e biaha aki, huntu ku ENNIA a disidí di laga hasi un ekstenshon di e pir. Djasabra último a hasi reapertura, den presensia di gerensia di Banco di Caribe i ENNIA, invitadonan, prensa i piskadónan di Playa Grandi Westpunt. Despues di algun palabra di sr. Dito de Kort, direktor di Banco di Caribe a realisá e reapertura di e pir na Playa Grandi Westpunt. Durante di e seremonia ofisial a ‘kòrta’ sinta den presensia di sr. Eddie de Kort i bosero di e organisashon di piskadó sr. van Thijs. “Nos ta masha kontentu di mira ku e pir ta sigui sirbi su propósito i ta di gran balor pa piskadónan di e área aki. Nos ta sigui kere den nos hendenan.  Banco di Caribe i ENNIA ta entregá boso e pir bèk i ta spera ku laman por sigui ‘duna’ na abundansia”, asina sr. de Kort a finalisá.  E selebrashon a bai kompañá ku un baile folklóriko dor di grupo “Ambiente Kultural” i naturalmente un momento sosial ku tur e piskadónan.