Willemstad, Luna Yen – e show di talento mas gusta bou di hoben – a yega su final. Djasabra aki 6 di desèmber pa 8or di anochi lo tuma lugá e Gran Final di Luna Yen 2014. Diesdos finalista lo partisipá pa wak ken lo resultá e ganadó di Luna Yen 2014 i ku lo representá Kòrsou na Kunstbende Hulanda. Durante 6 siman Luna Yen tabata den diferente bario pa buska talentonan nobo. E bario nan ku a wòrdu bishita tabata Wishi/Marchena, Sta.Maria, Barber, Sta.Rosa, i Boka Sami. Mas ku 160 mucha/hoben a partisipá i mustra kuantu talento tin riba nos dushi isla Kòrsou.  Di kada bario a saka e ganadónan, e promé i segundo finalista nan. E ganadónan a pasa outomátikamente pa e final,miéntras ku e promé i segundo finalista nan mester a kompetí den e Semi Final pa klasifiká pa e Final. Djasabra aki tur esnan ku a klasifiká ta bai kompetí den e áreanan di kanto, rap, poesia, baile i aktuashon. Esnan ku lo kompetí ta: Giheny Jamanica (aktuashon), Daymaris Lacruz (kanto),  Gedion Kook & Christopher Damiana (aktuashon),  Chaina Dieudonne (kanto), Zaerick Martha (poesia), Melanie Angela (kanto), Melissa Chirinos, Raymick & Rayzahna Martha (baile), Grupo Ken a Mandabu? (aktuashon), Sugar Mama (rap), Grupo S.A.G (aktuashon), Christy Wilson (kanto), Dio Semerel (baile). Ku animashon di MC Chris Strick ku tei ya pa vários aña kaba poniendo ambiente den e final di Luna Yen. Un i tur ta keda invitá pa bin disfrutá di un gran kompetensia djasabra aki na La Tentashon. Bin apoyá e hoben nan i mira un show di un nivel hopi haltu. Karchi ta kosta Nafl. 20,- i ta optenibel na Teatro Luna Blou, Time to Time (Saliña) i Pompstation (Sta.Maria). Pa mas informashon bishita nos página web : www.lunablou.com. Por yama Teatro Luna Blou na 462-2209 òf Facebook Page: Teatro Luna Blou & La Tentashon .