Ku e meta pa promové kultura di Kòrsou, fortifiká union i krea un konsiensia karibense Fundashon Stripan ta organisá e aña aki e di kuater edishon di Interkambio Kultural Ronk’é Kueru. Ronk’e Kueru ta konsistí di un wikènt kompletu di enkuentro entre agrupashonnan popular karibense ku ta trese músika i kustumber di fin di aña. Esaki ta enserá tambú, bari, tambor, paranda, maskarada, aguinaldo, dande, gaita i parang. E Interkambio aki ta tuma lugá aki na Kòrsou di 11 pa 14 di desèmber. Paisnan partisipante ta Kòrsou, Aruba, Boneiru i Venezuela. Di Boneiru ta bini Grupo “Tutti Frutti” i di Aruba “Muchanan di Mama Rosa”. Di Kòrsou lo partisipá e gruponan: Grupo Trinchera, Grupo Sorpresa, Grupo Power, Feli i su grupo, Grupo Sablika, Grupo Kondjemba, Los Rekuerdos Gaiteros, Los Originales, Vaqueros  Reyes Classicos, Grupo Caramileño, Grupo Den Dam i DJ Brain Rosa. Manera tur aña Fundashon Stripan ta duna homenahe na un baluarte di kada pais partisipante. Di Aruba e baluarte ta e tambulero Vicente Ras, di Boneiru e kulturista sentenario Tavio Sint Jago, di Kòrsou e famoso Beno Martis i di Venezuela e tambulero konosí di e agrupashon La Camachera, Jose Esteves. E aktividatnan di Ronk’e Kueru ta ranka sali djaweps 11 di desèmber for di  7’or den Nochi di Kompra riba Gomezplein Punda. Djabièrnè mainta dia 12 e gruponan ta bishita skol básiko i avansá i mèrdia nan lo ta na televishon. Djasabra dia 13 di desèmber Ronk’e Kueru lo ta presente for di 8’or di mainta te 2’or di mèrdia riba Plenchi Wilson Papa Godett entre Pòstkantor Punda i Plasa Nobo. Djasabra mèrdia lo tin un presentashon pa klientenan di SGR- Groep i anochi for di 6’or te ku 11’or nan ta presentá na Plenchi di Boca Samí. Djadumingu dia 14 di desèmber lo tin e klousura ku un grandioso Atardi Kultural di 2’or pa 12’or na Kas di Tradishon Stripan na Kaya Sabana Baka 31, na Sabana Baka. Fundashon Stripan ta invitá pueblo en general pa bin presensia e aktividatnan aki di fin di aña. Bin ku bo famia bin mira, skucha i apoyá e gruponan musikal interpretando músika di fin di aña. Bin dibertí, pasa kontentu i fortifiká e union entre pueblonan di e paisnan partisipante. Tur e aktividatnan ariba menshoná ta kompletamente GRATIS. Fundashon Stripan ta deseá pueblo di Kòrsou un felis fin di aña. Pa mas informashon por tene kontakto ku: sra. Giselle Rosalia (005999)514-5288. Fundashon Stripan na vanguardia di marka di Kòrsou.