Willemstad, Manera Kòrsou sa, ya 3 luna ta pasando. Fundashon Alton Paas ta konsiderá esaki 3 luna di viktoria mirando e desaroyo i e logronan ku e tres hobennan tin. Esaki ta dor di moveshonnan boluntario di múskulonan, oumento di stabilidat i sensibilidat i forsa den nan kurpa. Apesar ku e proyekto su durashon a kambia di 6 luna i bira 3 luna e hobennan tabatin e mihó inisio pa ku nan meta pa kuminsa kana. Dia 10 di yüni 2013 e hobennan a kuminsa nan programa di terapia intensivo i djabièrne awor e programa  ta terminá. Brigitte Schoevers, e fisioterapista tambe a djoin e tres hobennan for di dia 19 di ougùstes  2013.  Durante e último 2 simannan e fisioterapista a pasa tur dia huntu ku e tres hobennan den treinen. Ela haña instrukshon serka e speshalista di Alton, Jurvis i Steven. Den e lastu dianan di e siman aki Brigitte Schroevers mes a kuminsa hasi e terapia pa por apliká e método, pa haña on-the-job training i prepará pa dia nos hobennan ta na Kòrsou i tambe pa por yuda otro interesado den nos proyekto. Durante e tres lunanan ku ta pasando e hobennan a siña rekonosé nan múskulonan i nan funshon. Asina purba konsientemente huntu ku guia di e treinernan pa aktivá i fortifiká e múskulonan aki. Via di e ehersisionan kada hoben a logra kuminsa sinti mas den nan pia. Asta moveshon boluntario. Diferente múskulo ku tambe tabata débil a bira mas fuerte. Tur esakinan ta yuda pa nan por ta mas independiente. Dor di e ehersisionan, nan múskulonan ta menos steif i mas fásil pa move. Nan kurpa en general ta mas fuerte i nan tin mas forsa. Esaki ta krea e posibilidat pa nan por hasi nan tareanan di tur dia mas fásil i ku menos rísiko pa kai heridá nan mes. Durante di tres luna e tres hobennan i guiadónan a partisipá den grupo di diskushon na Project Walk kaminda temanan riba e desaroyo di dwarslaesie a bin dilanti. E grupo por a presensia presentashon di entre otro Dr. Daniel Lammertse, Medical director of Research at Craig Hospital i Dr. Oswald Steward, director of Research at Reeve-Irvine Research Center. E grupo a papia personalmente ku dr. Oswald Steward, Ph.D, director Reeve-Irvine Research Center. E hobennan a haña e oportunidat di a papia ku mas hende den e mesun situashon ku nan. Un persona ku mas ku 14 aña sintá den ròlstul, sr. Barney Miller despues di 4 aña hasiendo terapia na Project Walk a kuminsa dal stap. E persona aki a duna e hobennan komo palabra di motivashon pa mustra otronan kiko ta posibel. Pesei e viktoria di e proyekto aki. Pasobra e hobennan no solamente a bai dilanti físikamente pero tambe spiritual i mentalmente. Tur djasabra nan ta sinta i evaluá kon e siman a bai pa despues motivá i enkurashá otro pa por sigui ku fe pa e siguiente siman. Na final di e tres lunanan kada un di e hobennan a risibí nan resèpt di ehersisio den forma di un programa kompletu ku ta sirbi komo guia pa nan sigui na kas huntu ku e terapista pa sigui ku e preparashon pa nan bai kana. Fundashon Alton Paas ku hopi sintimentu di gratitut i alegria por bisa ku djadumingu awor 1 di sèptèmber e 3 hobennan i nan guiadónan lo yega kas bèk. E grupo lo sali djasabra 31 di ougùstes 7.30’or di anochi for di Carlsbad, San Diego ku ta 11:30’or di anochi na Kòrsou. Via Miami nan lo yega Kòrsou djadumingu 1 di sèptèmber pa 3:10’or di atardi. E hobennan ta gradisí komunidat di Kòrsou ku a duna nan e oportunidat kaminda nan a realisá ku tin speransa. Nan tin e oportunidat pa lucha pa un mihó kalidat di bida. Fundashon Alton Paas kier gradisí un biaha mas tur ku a i ta kere den nos. Nos komo un komunidat a dal un stap mas na nos desaroyo i tambe na nos unidat pa sirbi otro. Nos mes ta e kambio ku nos ke mira den nos komunidat i e kambio ta presente den nos!