Konsiderando e gran interés ku tin pa e kurso “Historia Muzik di Kòrsou”, durante lunanan di ougùstùs te ku novèmber Sentro Kultural Kòrsou a organisá otro kurso,  e biaha speshal pa un grupo di penshonado. Mester bisa, ku e kurso aki tabata posibel, danki na e sosten finansiero ku Ministerio di Desaroyo Sosial, Labor i Bienestar aduna, kaminda nos penshonadonan a risibí un supsidio pa por a sihui e kurso aki. Durante e kurso aki e studiantenan por a será konosí ku e desaroyo di muzik tradishonal di Kòrsou i tambe nan por a siña rekonosé ritmonan tradishonal i konhuntonan di muzik,  alabes sera konosí ku historia di kompositornan i otro desaroyo den muzik di Kòrsou. Na total un kantidat di  9 kursante penshonado a kaba e kurso ku éksito i tur tabata di opinion, ku e kurso a yena un bashí na informashon ku nan tabatin tokante nos muzik. E kurso tabata na enkargo di e konosido músiko Henri (Harry) Moen, kende dor di su forma úniko di duna lès i ku su splikashonnan semper al kaso, kla i konsiso, a mantené un entusiasmo kontínuo serka tur  e kursantenan. Durante un seremonia señora Irène Dick, Minister di Eseñansa, Siensia, Kultura i Deporte kompañá pa señor Elvio Cijntje, Presidente di Sentro Kultural Kòrsou i señor Harry Moen a entregá e sertifikado na esnan korespondiente. E personanan ku a kalifiká pa risibí nan sertifikado ta: Carlos Benito, Rudy Daal, Juan Felicia, Nestor Groenenberg, Hillegonda Jonkergouw, Risheline Look, Frank Palm, Gita Rib i Asela Winklaar. Personanan ku ta deseá mas informashon tokante e kurso di muzik speshal pa penshonado (60-plussers) por pasa na atministrashon di Sentro Kultural Kòrsou den oranan di mainta di 9’or pa 12’or di mèrdia, òf por yama telefòn 737-3510 òf 737-3682.