Danki na tur partner, kontribuyente i partisipantenan na e kaminata

Willemstad 20 di Novèmber 2014 – E edishon di 2014 di CIBC FirstCaribbean Walk for the Cure aki na Kòrsou, meskos ku riba e otro 16 islanan den Karibe, tabata un éksito rotundo.  E aña aki e Walk for the Cure na Kòrsou a surpasá tur ekspektativa i a generá 20 mil florin.  E loke a keda rekoudá a ser entregá na Stichting Princes Wilhelmina Fonds pa nan sigui ku nan trabou balioso kontra kanser. E chèk a keda entregá den presensha di e patrosinadònan i esnan ku a kontribuí i ku a uní ku CIBC FirstCaribbean den hasi e kaminata di e aña aki un gran éksito i a generá un bon kontribushon na e lucha kontra kanser den nos komunidat. CIBC FirstCaribean Walk for the Cure ta un evento pa generá fondo pa kuido i sosten di personanan den lucha kontra kanser.  E ta keda tene rònt Karibe den 17 pais kaminda CIBC FirstCaribbean tin su ofisinanan.  E banko dor di hasi esaki ta uní su mes na su kompania madre CIBC ku pa di 18 aña ta sostené e Run for the Cure di Canadian Breast Cancer Foundation.  Aña pasa CIBC a logra generá mas di US$ 25 mion pa sostené investigashon di kanser na pechu na Canada.  CIBC FirstCaribbean den region di Karibe a logra generá $194 mil na fondo pa invertí den kura, kuido i lucha kontra kanser den e diferente komunidatnan. Managing Director Dutch Caribbean, Pim van der Burg, a bisa:” Nos ta ekstremadamente kontentu di por ta envolví den un otro kousa balioso pa krea konsientisashon pa un malesa ku tin impakto riba nos tur.  Nos sa for di istorianan kompartí ku kanser ta toka nos tur den un òf otro forma, sea ta un miembro di famia, amigu, konosí òf e realidat ku un di nos mes mester konfrontá i hiba e bataya kontra di kanser.  CIBC FirstCaribbean ta sostené tur esfuerso pa alsa e konsientisashon públiko pa tur tipo di kanser, inkluso detekshon, tratamentu i e nesesidat urgente pa kura. Tur nos esfuerso komo parti di e aktividat di Walk for the Cure pa e motibu aki ta destiná pa krea mas konsenshi pa kanser.” CIBC FirstCaribbean na Kòrsou a aña aki a ser di djòin pa Deloitte komo, un spònser regional i spònsernan lokal manera Curoil, LBH, NuCapital, Adama, Empire Promotions, One Media Group, Wechi, Goisco, Stradius, San Pellegrino, Dolfijn FM, Subway, Amigoe, Quaker Oats Cookies, SPA, EWT, Mammoet Printing, meskos ku esnan ku a kontribui esta Steven Braaf, DJ Lu-C, Bryan Fraites, Fria, Sourcy, Royal Club, Inselair, Vita Malt, Avalon University, A Special Day, Brosaun, Porta Potty i Brigada di Seguridat i Formashon.   Huntu e union aki a provee pa e grupo di partisipantenan entusiasma ku a gosa di e kaminata dor di nos sentro di suidat. “Nos ta kontentu i eksitá, meskos ku e partisipantenan na e Walk for the Cure e aña aki, ku entrega di nos kontribushon na e kousa loudabel aki.  Stichting Princes Wilhelmina Fonds a proba atraves di su 65 aña di eksistensha di ta un pila importante den e lucha kontra di kanser.  Nos ta gradesido na boso pa esaki i ta spera ku nos pa medio di CIBC FirstCaribbean Walk for the Cure, por krea un bon tradishon  atraves di kua nos koleganan, famia, amigu i otronan den nos komunidat por djòin nos banko i nos partnernan den krea konsenshi i fondo pa boso fundashon por sigui ku su trabou.”  Lysaira Ortela, Marketing Manager di CIBC FirstCaribbean na Kòrsou a bisa. Di akuerdo ku Sra. Yvonne Verbrugge di Stichting Princes Wilhelmina Fonds: “ Nos ta sumamente kontentu ku e generosidat di empleadonan, famia i amigunan di CIBC FirstCaribbean i su partnernan den e esfuerso aki.  Nos fundashon ta apresiá e esfuerso ku kompanianan ta hasi pa krea konsientisashon i sosten pa e kousa aki.  Nos ta spera ku e CIBC FirstCaribban Walk for the Cure lo sigui krese i bira un evento ku ta krea tur aña di nobo mas konsenshi pa kanser i sosten pa esnan ku ta lucha kontra di kanser den nos komunidat.”