Willemstad 19 di novèmber 2014 –  Durante di un seremonia ofisial Minister pa Desaroyo Ekonómiko, Sr. Stanley Palm, duna inisio na trabounan pa konstrukshon di un food court den zona liber na Koningsplein. Na mes momentu a introdusí tambe golfcart pa transporte di alrededor di 1.500 promedio pa luna di klientenan ku ta bishita nos zona liber pa hasi kompra. Esakinan ta parti di un esfuerso mas grandi pa mehorá e eksperensha di e kliente ku ta bishita negoshinan den nos zona liber. E esfuerso mayó aki ta pa mehorá e eksperensha, huntu ku esfuersonan di Curinde pa posishoná i merkadeá nos zona liber i di parti di gobièrnu su esfuerso pa krea mas konekshon aéreo  tur esaki lo kontribuí na bolbe hasi nos zona liber un pila ekonómiko ku un mihó perspektiva pa futuro. E akto ofisial a tuma lugá den presensha di klientenan di Curinde. E food court ta pinta di bira un goya di un fasilidat ku lo sirbi tantu e klientenan ku ta bin hasi nan kompra den nos zona liber komo empleadonan ku ta traha den nos zona liber na Koningsplein  Lo tin posibilidat pa dos diferente kushina ku kada un punto di benta. Curinde lo hasi un eskoho di e tipo di kushina ku ta ser sirbi abase entre otro di deseo di e klientenan. E food court lo konsistí di dos terasa, di kua esun ariba lo ta kubri ku un tipo di tènt moderno. En total e food court ta kubri un superfisie di 270 m² na suela i 85 m² riba e promé piso. Diseño di e food court tabata den man di Studio Acht. E trabounan ta kuminsá mes ora i ta planeá pa finalisá na ougùstùs otro aña. Direkshon i supervishon di e trabounan ta den man di J&R project management and design i e kontratista ta Servicorp N.V. Minister di Desaroyo Ekonómiko Sr. Stanley Palm durante di su diskurso a enfatisá e importansha di desaroyo di nos zona liber. Na mes momentu Minister Palm a mustra kon Curinde i gobièrnu ta duna kontenido na e esfuersonan pa posishoná nos zona liber den mundu, krea mas konekshon pa nos isla i mehorá e eksperensha di e kliente ora e bin hasi su kompra den nos zona liber. Minister Palm a enfatisá tambe ku esaki mester ta un esfuerso huntu ku komersiantenan ku tin nan negoshi den nos zona liber. E kombinashon aki mester bira un motor fuerte ku ta krea mas aktividat den nos zona liber i mas trabou pa e yu di Kòrsou Minister Palm a konkluí bisando. E invershon total di Curinde den e dos fasilidatnan aki ta di alrededor di Nafl.600.000,-