Kòrsou Konektá ta organisá un Diálogo Habrí, djasabra dia 15 di novèmber próksimo riba e tema: Nos relashon ku otro. Tur hende por partisipá grátis. Por inskribí via www.ennia.com/konekta Kòrsou Konektá ta un organisashon hóben ku ta trese hende den kontakto ku otro pa kompartí eksperienshanan personal riba un tema di interes general. E interkambio ta tuma lugá segun un patronchi fiho. Ta forma grupo di partisipante ku ta papia ku otro i skucha otro sin drenta den debate ku otro. E diálogo ta bai na Papiamentu i por forma grupo tambe na Hulandes.

Meta:

Kòrsou Konektá a lanta a base di e realidat sosial na Kòrsou. E meta ta pa krea un fórmula kaminda hende ta komuniká ku otro riba temanan delikado, sin ku esei ta resultá den pleitamentu. Kòrsou Konektá ta trese hende huntu ku normalmente no ta papia habrí ku otro riba asuntunan ku ta toka nan di bèrdè. E partisipantenan ta skucha kon otronan ta eksperienshá e asuntu, i nan ta konta kon nan mes ta eksperiensh’é. Esaki ta un fórmula pa mengua e kontroversianan persistente entre hendenan individual, den organisashonnan, i mas en general.

Orígen:

E forma di diálogo akí ta basá riba un inisiativa ku a nase na 2001 na Rotterdam, despues di e atakenan riba Twin Towers na New York. E intenshon tabata pa drecha e komunikashon entre e diferente gruponan di poblashon despues di e distansha ku a surgi komo resultado di e suseso. Entre tantu nan ta apliká e forma di diálogo ei den 90 siudat. Pa mas informashon, por mira tambe www.nederlandindialoog.nl Na Kòrsou, Rotary Club Willemstad (RCW) a duna e impulso pa introdusí e forma di diálogo akí den nos komunidat. Pasobra aki tambe tin diferenshanan grandi den e forma ku hende i organisashonnan ta eksperienshá sierto asuntu difikultoso. Na 2013, RCW a trese dos entrenador Kòrsou: André Rojer, presidente di e fundashon Maastricht in Dialoog, i su ko-entrenador Mine Stemkens. Entretantu 28 hende na Kòrsou a haña un entrenamentu pa guia e diálogo.

Patrosinio:

Na e momentu akí, e aktividatnan di Kòrsou Konektá ta patrosiná pa Rotary Club Willemstad, Lions Club Curaçao, Kiwanis Club Curaçao, Soroptimisten Club Curaçao, Ennia, Maduro & Curiel’s Bank i Curaçao Trust Management.