Willemstad – GreenTown ta kere den e asina yamá “ripple effect”. Ku e pensamentu aki a inisiá e promé GreenTown Party na Kòrsou. Segun presidente di GreenTown señor Andrés Casimiri, “si kada persona ku tabata presente na e GreenTown Party sigui pasa palabra i organisá nan propio Party aki poko dia míles di yu di Kòrsou mas ta pará tras di GreenTown”. Direktiva di GreenTown Kòrsou por mira bèk ku satisfakshon e promé edishon di GreenTown Party na Kòrsou. Partisipantenan a kontribuí ku preguntanan relevante i kritiko, opinion, sugerensha i proposishonnan. Na e okashon aki tabata presente tambe miembronan di e fundashon na Kòrsou i presidente di GreenTown Curacao Nederland, señora Nasha Desbarida.A inisiá e atardi ku un presentashon di señora Bianca Neman, boluntario i bosero kaminda el a para ketu na e inisiativa, historia, akshon i logronan di GreenTown for di dia a kuminsá ku e idea na aña 2010 te ku aworakí. Entre otro señora Neman a para ketu na e ròl ku GreenTown Curaçao tin pa trese kambionan grandi na Kòrsou, manera mihó uso di e tereno kaminda ISLA ta situá i muda muchanan ku ta bai skol den barionan di Habaai, Wishi i Marchena, na barionan ku no ta asotá pa polushon. Durante su presentashon Andrés Casimiri a kontestá e tres preguntanan “Dikon un GreenTown, Kon i Kiko” ta bai hasi. Segun Casimiri e sifranan di CBS ta papia palabra kla, tin mas ku 15 mil desempleo i esaki ta un di e motibunan mas prinsipal ku a lanta GreenTown: trabou pa tur desempleado na Kòrsou, e yunan di Kòrsou na Ulanda ku tin gana di bin bèk nan pais i tur empleado di ISLA ku ta bai pèrde nan trabou dia Isla mester sera. Casimiri a presentá desaroyonan ku a tuma lugá na Singapor, un isla ku ta kasi mesun grandi ku Kòrsou, i a krese nan populashon di 1,000,000 na aña 1965 pa 5 mion habitante (i tur tin trabou) awe. El a bira un di e paisnan mas próspero na mundu. Casimiri a mustra ku Kòrsou tambe por bira un isla modelo. Banda di esaki GreenTown ta sigui e desaroyonan mundial ku ta un pais sin polushon, usando energia duradero i ku ta foko riba diferente industria i servisio sustanibel, esaki kompará ku un industria so manera di refineria. GreenTown ta trahando riba 3 plan konkreto pafó di e área di ISLA, ku por kuminsá kuné for di aworakí. Ta trata di un industria di peska ku anekso un bario kaminda e piskadónan por biba, ekspandé zona liber, drecha dòk i konstruí un dok flotante nobo ku ta kumpli ku tur eksigensha moderno i internashonal. Durante e seshon di pregunta diferente proposishon a bini dilanti. Esakinan tabata varia entre un aserkamentu “bottom-up”, pa pueblo lanta riba i eksigí, pero tambe unu “top-down” kaminda mester sigui lobby serka gobièrnu i Staten pa nan konsiderá e alternativa aki seriamente. Otro proposishon ku a bini dilanti ta e idea pa kada siudadano, ku ta kontra pa sigui ku refineria na Kòrsou eksigí di e partido òf miembro di Staten ku el a vota pe, pa tuma akshon. Presentashon den bario i na skol tambe a ser konsiderá hopi importante. Konklushon general di e promé GreenTown Party tabata ku tin konfiansa den e plan i e diferente proyektonan i ku mester sigui promové GreenTown rònt Kòrsou serka grandi i chikí, den sektor privá, sosial i públiko. GreenTown su úniko interes ta pa Kòrsou bira un pais 100% duradero, ofresiendo míles di kupo di trabou permanente i ta generá entrada i ganashi konsiderabel pa gobièrnu. Direktiva di GreenTown ta invitá un i tur ku ta interesá pa organisá un Party pa nan famia òf konosí, trahadó, kolega etc. pa djòin GreenTown via su FB página GreenTown Curacao Angel òf manda un mensahe via e FB página GreenTown Curacao. Por tuma kontakto tambe atraves di e website www.greentowncuracao.com òf yama number di telefòn 512-2440 pa yuda organisá un GreenTown Party.