Djadumingu, 8 di sèptèmber

Trinti’un (31) di ougùstùs 2007, riba petishon di Fundashon Nos Grandinan, e tempu ei sra. Gezaghèber mr. Lizanne Dindial i tambe èks Diputado sra. Marilyn Alcala – Wallé, na nòmber di Gobièrnu di Teritorio Insular di Kòrsou, a ofisialisá e asina yamá “Grandparents’ Day” pa Pais Kòrsou. Sra. Geselle Rosaria – Coffi, den kalidat di Presidente di Fundashon Nos Grandinan a tuma e dekreto for di man di sra. Gezaghèber i tambe sra. Diputado drs. Marilyn Alcalá – Wallé. Diferente Pais ta selebrá “Dia di Wela- i Tawelanan” ku tur aña di nobo ta kai riba e di dos djadumingu den luna di sèptèmber. E aña aki “Dia di Wela- i Tawelanan” ta djadumingu, 8 di sèptèmber próksimo i lo mester ta un “automatic family-day”, kaminda famia kompletu ta rondoná e pilá(nan) na kabes di un famia, esta e wela, tawela, bisawela, bisatawela, etc. (dependé kuantu generashon e famia ta konsistí di dje). Riba “Dia di Wela- i Tawelanan”, Pais Kòrsou mester mustra atmirashon na esnan ku ta na kabes di famianan i ku ta esnan responsabel pa bon edukashon di nan desendientenan i de paso pa pais Kòrsou. Riba e dia aki, nietunan, bisañetunan, tumañetunan i demas (dependé atrobe kuantu generashon e famia ta konsistí di dje) ta duna atenshon na mayornan di nan mayornan, e asina yamá sentro(nan) di nan famia. Un Wela/Tawela, komo fundeshi di nan famia, tambe tin na nan enkargo edukashon na nan desendientenan/generashonnan. Nos por tin un mihó Kòrsou, basta nos hasi uso di konsehonan ku e pilánan di famia ta duna na nos. Djadumingu, 8 di sèptèmber próksimo ta un dia spesial ku por usa pa fortifiká e komunikashon entre diferente generashon mas tantu. Ta hopi importante pa nietunan huntu ku nan wela, tawela i de paso nan mayornan traha riba stamboom di famia i wak potrètnan di nan antepasadonan. Importante ta tambe pa wela- i tawelanan pone énfasis riba uso di nos norma- i balornan eksistente ku no a bai pèrdi, pero lamentablemente no ta wòrdu usá diariamente  òf kontinuamente. Fundashon Nos Grandinan ta urgi pa tantu misanan komo skolnan kuminsá na konsientisá nos muchanan i pueblo en general pa duna atenshon firme na e fundeshi di kada famia. Tambe lo ta bon pa famianan kuminsá prepará for di awe pa organisá nan propio “family-day” pa asina demostrá e kabesnan di nan famia, kuantu balor nan tin pa famia kompletu i trata na saka tur “djus” for di nan, mientrastantu nan ta na bida! Djadumingu, 8 di sèptèmber, Fundashon Nos Grandinan lo tene nos magno selebrashon, kual entrada, manera nos grandinan a bin ta kustumá kuné kaba pa 13 aña largu, ta gratis. Keda pendiente.