Selebrashon di plata pa e show di Pasku mas grandi na Kòrsou:
WILLEMSTAD – E preparashonnan pa e di 25 aniversario di Christmas Showcase Beauty & Fashion Weekend a ranka sali. Anualmente, Destination Curaçao ta ofresé Kòrsou e grandioso aki den sala di ekshibishon di WTC. Tur aña di nobo, WTC ta keda kombertí den un mundu navideño ofresiendo e bishitante tur detaye pa e temporada di fin di aña i e aña aki no ta un eksepshon. Antisipando e Christmas Showcase Beauty & Fashion Weekend ku e aña aki lo tuma lugar riba dianan 27 pa 30 di Novèmber, Destination Curaçao a habri oportunidat pa empresanan kuminsá reserva nan ubikashon den e sala di ekshibishon. Negoshinan ku ta interesá lo haña e oportunidat pa “showcase” nan artíkulonan di fin di aña den e èkspo. Christmas Showcase ta konosí kaba komo un èkspo kompañá ku un desfile di moda pa sera aña na unda ku públiko por atmirá i kumpra artíkulonan sumamente bunita ku ta wòrdu presentá den stèntnan dekorá den kolonan festivo, ofresiendo produktonan ku ta klòp ku e temporada i den un esfera spesial ku ta duna inisio na e “Temporada di Pasku”. Loke sigur no por keda afó ta e “Fashion Show” na unda ku modelonan tantu lokal komo internashonal lo bai presentá e último diseñonan pa fin di aña riba e pasarela di Christmas Showcase. Un show yená ku kos nan grandi, paña nan bunita i produktonan úniko. Despues ku aña pasá e “Instyle Cooking Stage” tabata un éksito total, e aña aki e ta bèk. Riba e “stage” aki ekspertonan den kushina lo haña e oportunidat pa demostrá nan talento. Esnan ku ta interesá por demostrá por ehèmpel kon ta dòrna un bolo, traha ayaka, dekorá kuki den tema di Pasku òf simplemente prepará un dushi ham na fòrnu. Kòrda ku lugá ta limitá pues tuma kontakto lihé!
Arts & Crafts:
Komo spesial e aña aki, a duna oportunidat na tur persona ku ta traha artíkulonan di Pasku pa partisipá na Christmas Showcase na un preis sumamente atraktivo. Di e forma aki Destination Curaçao ta stimulá obra di man, artesanía bou di nos empresarionan lokal tambe. Tur persona ku ta traha kos na nan kas ta haña e oportunidat di forma parti di e evento aki. Pues, si bo ta traha i ke bende artíkulonan manera, krans di Pasku, paña di mesa bòrdá den tema di fin di aña òf bo ta dekorá blusa òf T-shirt den tema di Pasku -no pèrdè tempu i tuma kontakto mesora ku Destination Curaçao pa sigurá bo espasio den sala di ekshibishon di World Trade Center, Curaçao. Christmas Showcase Beauty & Fashion Weekend lo tuma lugá 27, 28, 29 i 30 di novèmber na World Trade Center, Curaçao. Pues si bo ta deseá di bria ku bo partisipashon den Christmas Showcase Beauty & Fashion weekend 2014 “25th Anniversary” tuma kontakto ku Destination Curaçao mas pronto ku ta posibel na numbernan di telefon 463-6178 òf 463-6484 pa reservá un lugar, tantu pa e ‘booth-nan’ komo pa e desfile di moda. Keda pendiente pa diferente sorpresa ku lo tin e aña aki. Christmas Showcase Beauty & Fashion Weekend 2014 selebrando su 25 aniversario huntu ku pueblo di Kòrsou.