Willemstad – òktober ta luna di bestia i Kyoto Sushi & Grill na Jan Thiel beach ta presentá for di awor riba nan menu un roll nobo, úniko i delisioso ku yama “Zoo-shi”. E delisioso roll aki ta un idea di e propietarionan Patrick i Yohanna van der Kolk ku ya pa algun tempu tabata kana ku e idea pa hasi algu pa yuda na desaroyo di Parke Tropikal. Señora Yohanna a drenta den kushina i a krea un roll úniko den su forma i presentashon, un roll delisioso den kolonan di un zebra. Pa kaba di hasié apart komo ta un roll na benefisio di nos parke di bestia, a duné e nòmber di “Zoo-shi”. Na kompra di un “Zoo-shi” roll na Kyoto Sushi & Grill na Jan Thiel beach e kliente ta hasi un donashon pa nos parke di bestia. Den un ambiente hopi ameno na Kyoto a hasi presentashon ofisial di “Zoo-shi” roll i tur presente por a purba e delisioso roll aki. “Zoo-shi” roll ta trahá ku tempura shrimp, salmou, salada miksta, pulpo i masago. E roll ta tapá ku masago i piska blanku. “Zoo-shi” roll no solamente ta pone bo boka kore awa na kompra di e roll aki bo tambe ta kontribuí na desaroyo di Parke Tropikal. Fundashon Parke Tropikal ta yama famia van der Kolk masha danki pa e gesto noble aki, ku na kompra di kada “Zoo-shi” roll un parti di e ganashi lo wordu duna mensualmente na nos Parke Tropikal. Asina Kyoto Sushi & Grill i amantenan di sushi tambe ta bira Amigu di Parke Tropikal i aporta na su desaroyo. Bishitá Kyoto Sushi & Grill na Jan Thiel beach tur dia di djaluna pa djadumingu di 5 or di atardi pa 11 or di anochi. Por yama pa take out tambe na 735 00 41. Por follow Kyoto Sushi & Grill i tur su ofertanan diariamente riba Facebook.