Dia 2 di novèmber 2014 Servisio di Edukashon Hogar i Salu ta organisá un tremendo Feria di Salu na Boka Sami. E feria di Salu aki ta tuma lugá na e krèsh Fundashon Elias ku ta keda banda di e vèlt di Jong Colombia. E Feria ta kuminsá for di 9’or di mainta te ku 5’or di atardi. Pa e dia aki e pueblo di Kòrsou kompletu ta keda invitá , pero spesialmente e habitantenan di Boka Sami, Jandoret, Klein St.Michiel, i Corasol. Ta pidi tur partisipante pa laga tur preokupashon di otro kosnan un banda, i dediká un dia pa abo , i bo famia su salu. Ta bon pa nos kòrda ku hopi biaha nos ta pone otro prioridat riba e  atenshon pa nos salu, pero,” Servisio di Edukashon Hogar i Salu” ta hasi un apelashon pa tuma un dia pa atendé ku bo salu. Dikon? Pasobra si bo no tuma un dia pa bo salu, enfermedat òf malesa ku bati na bo porta, ta obligá bo pa pone atenshon serka dòkter i spesialista i den kasonan mas ekstremo, asta hospital i pió ainda den kuido intensivo. Promé ku yega asina leu, nos mester kuminsá apliká  e fórmula di “Prevení ta mihó ku Kura” pa evitá kasonan ku por nifiká, empeoramentu di bo salu , òf sea, ku prevenshon semper bo ta haña un mihó manera pa atendé ku bo salu, i laga mayoria enfermedatnan pafó di bo porta. Den e kuadro aki “Servisio di Edukashon Hogar i Salu” ta propagá, i ta presentá guia di estudio nan sientífiko i profeshonal pa prevení  enfermedatnan. I den kaso ku ya nos tin e enfermedat kaba, tambe guia nan natural pa aliviá e situashon. Ta p’esei mes SEHS, ta organisá e Feria nan di Salu  ku ta duna aporte na bienestar i salu di nos poblashon. Kaminda e partisipante por haña informashon riba diferente tereno ku ta abarká kuido di nos salu, i den kaso ku tin malesa kaba kon pa atendé ku e rekursonan natural pa hañá un mihó resultado. E programa di 2 di novèmber mes ta hopi varia, i tin diferente instansia ku ta partisipá, manera: FMA, Skuchami, Sokudi, Rode Kruis, Wit Gele Kruis, Servisio di Edukashon Hogar i Salu, SVB, i tambe 9 tent di “Newstart”.NEWSTART” ta abreviashon na ingles i ta para pa” Nutrition, Exercise, Water ,Sun ,Temperance, Air, Rest, i Trust in God”! Ademas riba e dia aki lo tin algun tènt nan ku alimentonan natural, yerba, i zeta nan natural i kurativo i tambe kuminda saludabel, djus natural, masashi. Tambe ta bai tin charlanan riba prevenshon di malesa , a base di yerba i alimentashon, i kon kuida bo pánkreas, i kurason presenta pa sr. Rigot Seferina. Direktor di SEHS Oswaldo Cabrera lo ta enkargá ku un seminario”Bo alimentashon ta bo remedi”. Dr. Panneflek lo trese un charla riba sirkulashon di sanger i e benefisio di ehersisio i masashi. Nos mester pone énfasis ku tur mayornan por bini trankilamente ku nan yunan, ya ku tin un skina spesial pa e muchanan. Kaminda lo duna nan atenshon spesial , miéntras e mayor ta tuma su tempu pasa na e diferente tènt nan ku informashon pa su salu. Pa e dia aki  partisipantenan por registrá pa tuma lès di kushinamentu vegetariano, por inskribí pa bestelling di produktonan  vegetariano, por inskribí e muchanan di 12 aña pa ariba pa lès sea di drùmbènt òf blas instrumènt, serka “ Stichting Melody Makers” mas informashon tokante di esaki ta risibí na e tènt di Melody Makers e dia ei mes. Kier men ta hopi informashon sumamente balioso ta bai tin na e Feria di Salu ku ta tuma lugá  na Boka Sami dia 2 di novèmber 2014, ku ta kuminsá for di 9’or di mainta te ku 5’or di atardi. Tur partisipante tin oportunidat di gana un “weekend stay all inclusive” den Curaçao Plaza Hotel.