WILLEMSTAD – Djaweps último Gobernador Lucille George-Wout a risibí komo promé riba suela di Kòrsou un ehemplar di e buki ‘Niemand wandelt ongestraft onder palmen’ di señora Millicent ‘Dudi’ Smeets-Muskus (na man drechi). Esaki a tuma lugá na final di un enkuentro ameno, informativo i kultural na restorant Shore di Santa Barbara Resort ku sinku pianista (Wim Statius Muller, Randal Corsen, Livio Hermans, Johnny Kleinmoedig i Gino Coelho). E buki mes ta un dokumentashon hopi ekstenso riba kon e rumannan Lens (Theo a traha komo dòkter na Kòrsou i e èks militar Lodewijk) na kuminsamentu di siglo 20 a start un proyekto pa un kultivo di abestrus ‘Albertine’ na plantashi Choloma entre 1912 i 1931. Lodewijk su kasá Ida Lens-Bernhard a deskribí kon e proyekto komersial aki a lanta i tambe kon el a kaba na nada. Parti di e storia ta tambe kon riba un dia a haña e asistente Willem Lensvelt morto den un pos na Choloma. Hopi aña despues a logra un konfeshon pa e asesinato aki. E buki aki ta registrá un parti interesante mas di historia di Kòrsou. E buki ta optenibel na librerianan lokal.