‘Shopping’ fo’i kas ku Banco di Caribe i CPost:

WILLEMSTAD- Òktober 2014: Ayera a tuma lugá un konferensia di prensa kaminda Banco di Caribe i CPost a anunsiá nan koperashon pa hasi e servisio di ‘PuntoMio’ aún mas faborabel pa klientenan. Usando e MultiCard di Banco di Caribe e kliente por hasi kompra online na un manera mas fásil, lihé i sigur.

Tokante MultiCard:

Banco di Caribe su MultiCard den tempu kòrtiku a bira un di e tarhetanan pre-pago mas popular riba nos isla. Un i tur por bini na remarke pa un MultiCard; e karchi ta brinda un mundu di posibilidat- hasi kompra ‘online’ ta un di nan.  E karchi pre-pago ta personalisá, nòmber di e kliente ta wòrdu imprimí riba dje. Por karga e karchi via di online banking na www.bancodicaribeonline.com i tambe por retirá plaka kèsh di kualke ATM, mundialmente. E saldo disponibel riba e  “MultiCard” ta loke ku e kliente rekargá, e karchi ta bálido pa 12 luna, kuminsando riba e dia ku e wòrdu aktivá. E kliente tin opshon pa risibí su statement (estado di kuenta) elektrónikamente. Di akuerdo ku representante di Banco di Caribe, hasiendo uso di e MultiCard pa realisá kompra via di Internèt ta garantisá un transakshon sigur i seif. Ademas di esaki por hasi kompra na Merka fásilmente ku e servisio di PuntoMio i risibí esaki hopi lihé te na kas. Pa saka un MultiCard klientenan por bishitá un di e filialnan di Banco di Caribe- Saliña, Punda, Otrobanda i Santa Maria òf por akudí na filialnan di CPost na Santa Rosa, Groot Kwartier, Punda, Otrobanda òf WTC. E kliente lo mester akudí ku un sédula, pasport òf reibeweis bálido i yena un formulario di aplikashon. Na momento ku e kliente risibí su MultiCard e por bai riba e wèpsait http://cpostint.puntomio.com i traha su propio perfil ku e ta usa pa hasi su kompra ‘online’. Ta bon pa menshoná ku por hasi kompra na e pakus na Merka di bo eskoho i ‘skapa’ 7% di impuesto (Sales Tax). Banco di Caribe ta kontentu di por a ofisialisá e koperashon ku CPost/ PuntoMio, awor klientenan por sinti nan mes sigur na momento di hasi nan kompra den eksterior. Nan tin opshon infinito di pakus na alkanse den komodidat di nan propio kas ku Banco di Caribe i CPost. Pa mas informashon bishitá www.bancodicaribe.com òf www.puntomio.com.