ORANJESTAD — Diabierna Minister di Turismo ta anuncia noticia hopi positivo pa turismo di Aruba. Ta trata aki di un noticia confirma pa tanto aeropuerto di Aruba como tambe Oficina di Turism, cu ta indica cu Southwest a anuncia cu Aruba ta bay haya un gateway nobo cuminsando desde maart 2015. Desde luna di september caba Southwest lo cuminsa pone esaki e vuelo adicional cu un capacidad di 143 asiento for Houston pa Aruba, cu un total di 16 frequencia e mandatario ta bisa. Minister Oduber ta indica cu e vuelonan di Southwest for di Orlando, Atlanta y Baltimore a crea oportunidadnan grandi pa diversificion di nos mercado turístico. Esaki ta forma parti di e strategia cu nos tin pa cuminsa atrae mas y mas e bishitante afluente cu ta esunnan cu ta gasta riba nos isla y cu ta bin for di e parti West di merca. Minister Oduber ta sumammente contento cu e confirmacion di Southwest haciendo Aruba un bes mas e prome destinacion den Caribe cu lo ricibi un vuelo for di e destinacion Houston pa Aruba. E vuelo aki lo tuma lugar tur diasabra y lo inicia na maart 2015. Esaki ta sigur un noticia sumamente positivo pa turismo di Aruba. Esaki ta mustra un biaha mas riba e confianza cu tin den e industria y mas ainda nos a haya for di Ahata y for di Oficina di Turismo cifranan pa augustus, caminda hotelnan aki na Aruba a mira un crecemento den e grado di ocupacion di 6.7%. Pa loke ta trata crecemento di turismo nos ta conta cu un aumenta 14% den luna di augustus. E mandatario ta sumamente satisfecho cu no ta solamente e cifranan a crece pero cu Southwest ta introduci un gateway nobo pa Aruba.Pa añanan largo a concentra riba e parti North East y e maneho tabata uno pa difersifica mas y mas y logra trece e bishitante for di e parti West di merca tambe. Minister Oduber ta convensi cu e vuelonan di Southwest lo keda aumenta mas, sigur ora mira kico e ta significa den cantidad di bishitantenan pa Aruba.