Stichting Alzheimer Curaçao ta konmemorá e dia aki ku diferente aktividat durante e luna aki. ADI, Alzheimer Disease International, organisashon mundial kaminda tin fundashonnan di alzheimer di 80 pais komo miembro, inkluso Kòrsou, a skohe e aña aki komo tópiko: “kon pa redusí e malesa di Alzheimer”. Demensia ta e malesa ku ta karakterisá su mes pa pèrdida di memoria. Tin diferente tipo di demensia, Alzheimer ta kubri 60 pa 70%. Nos meta ta: Yuda halsa kalidat di bida di e persona ku ta sufri di demensia. No ta hasi esaki pa medio di informashon, sosten i gija ku nos ta duna na e famia, pa nan por duna un mihó kuido, kuidando nan mes. Nos enfoke ta riba terapia no medisina. E malesa di Alzheimer tin diferente kara i no ta hasi distinshon di rasa, kredo, kolo, edukashon ni posishon sosial. E último investigashon a keda relatá den “World Alzheimer Report ” i tin komo tópiko, ku nos por redusi e malesa di Alzheimer:Diagnóstiko trempan di Alzheimer tin benefisionan di salubridat, finansiero i sosial. E ta revelá ku:

• Tres kuart di e 44 mion personanan ku mundialmente ta sufri di Alzheimer no ta keda diagnostiká i no por hasi uzo di tratamentu, informashon i kuido.
• Mayoria bia tin e konsepto robes ku e lubidamentu aki ta parti di behes i ku no por hasi nada kuné.
• Medisina i intervenshon sikososjal den e estado trempan di e malesa ta halsa e komprondementu, independensha i e kalidat di bida. Sosten i gija pa esun ku ta duna kuido ta halsa e animo, redusí strès i retardá institunalisashon di e persona ku ta sufri di demensia.
• Gobièrnunan, teniendo kuenta ku e kosto haltu riba tèrmino largu di e malesa aki, mester invertí awor pa spar den futuro. Diagnóstiko trempan por spar $10.000 pa persona pa aña.

Nos di Stichting Alzheimer Curaçao tei pa duna e guia i sosten ku e famia tin mester. Nos tei pa e famia ku no ta komprondé kiko e malesa ta, kiko e konsekuenshanan ta, i nos tei pa abo nos dushi pueblo di Kòrsou ku mester di e sosten. Nos kier a invitá pueblo di Kòrsou na un dia di famia dia 21 sèptèmber na hòfi Wayaká. Entrada ta grátis bin kanta, baila, relahá huntu ku nos di Fundashon Alzheimer Kòrsou.Orario ta 10:00-16:00.