Kralendijk, 17 di sèptèmber 2014 Tur kos ta kla pa Regata 47. Igual ku aña pasa Gobièrnu di Boneiru a enkargá Bonaire Sailing Foundation (BSAF) ku e kompetenshanan di boto i e komishon ku ta organisá aktividatnan públiko ta enkargá ku Festival di Regata konhuntamente ku Tourism Corporation Bonaire (TCB). Regata 47 ta tuma lugá entre 5 pa 11 òktober. Djadumingu 5 di òktober lo tin e inskripshon ofisial na kas di Regata i reunion di kapitannan na bordo di Freewinds. Miéntras e kompetenshanan di boto ta tuma lugá di djaluna 6 pa djabièrnè 10 òktober. Festival di Regata ta tuma lugá for di djarason 8 pa 11 di òktober den parke Wilhelmina. Preparashonnan pa basta dia ta tumando lugá tantu pa loke ta trata e kompetenshanan riba laman i tambe e Festival di Regata ku ta kargá ku presentashon di diferente banda, gruponan di baile i atrakshonnan speshal. Despues lo duna mas informashon di e kontenido di e programa. Interesadonan pa hür stènt pa e festival di Regata mester pasa inskribí personalmente na ofisina di Sekshon Kultura Arte i Literatura (SKAL), Kaya E.C. Craane na Playa Pabou, no ta tuma reservashon pa stènt via di telefon. Inskripshon ta sera 29 di ougùstùs, 2014 òf na momentu ku yega na e máksimo di stènt òf tipo di produkto pèrmití. Organisashon i personanan establesé na Boneiru tin preferensia pa bini na remarke pa un stènt, tur ku inskribí mester presentá ku sédula bálido. Último dia pa mustra prueba di pago na SKAL ta 30 di ougùstùs, 2014. Pa informashon tokante stènt pa dia di Boneiru por tuma kontakto ku SKAL na number di telefon 7178868 òf 7175330 ekstenshon 344.