ORANJESTAD — E intencion cu na final di renobacion den y rond di centro di ciudad, automobilistanan ta bay tin 4 parkeergarage na nan disposicion. Den e prome parti di 2015 ta bay cuminsa cu e prome proyecto di e indole aki bou guia di FCCA. Junior Tromp, di Infra-Team di Ministerio di Desaroyo Teritorial, Infrastructura y Integracion cu ta encarga cu tur e proyectonan di infrastructura di Gabinete Mike Eman II, ta siguiendo desaroyo di tur trabounan den y rond di centro di Oranestad. E por a conta cu siman pasa e team tabatin reunion cu FCCA riba e parkeergarage cu mester bini unda antes tabata Tivoli Club. E plan di FCCA pa e garashi aki ta bay ta algo unico na Aruba. E ta consisti di tres piso pa estacionamento y e piso mas ariba lo ta apartamento pa personanan di tercera edad. E proyecto ta wordo construi riba henter e area di unda Tivoli Club y e canchanan di tennis tabata situa. E plan ta mustra cu e lo brinda espacio pa 300 auto staciona, cual ta un avance grandi. Den pasado a realisa diferente evaluacion, door di entre otro studiantenan di Hulanda. Tin investigacionnan di 1995, 2005 y 2013. Y poco-poco a constata cu e demanda pa espacio a cuminsa aumenta te cu den e ultimo investigacion el a surpasa loke cu tabatin disponibel. E ultimo ta cu Gobierno a duna Arubus e autorisacion pa soluciona e prome problema di espacio, introduciendo parkeermeters den areanan cu ta disponibel. Esaki principalmente pa personanan cu ta bin haci compras den caya principal y no ta keda mucho ora. E plan aki ta wordo introduci en espera di construccion di parkeergaragenan. Ing. Marlon Croes, director di DOW, riba e tema aki a duna di conoce cu e intencion ta cu na final di henter e plan di renobacion, Centro na Playa lo conta cu cuatro parkeergarage, cu ta special pa e personanan cu ta traha den y rond di centro, cu mester di un espacio di basta ora y sigur. Ademas di e garashi cu lo wordo construi na ex-Tivoli, tin mas proyecto patras di e stacionamento di Arubus grandi na Playa, otro na e skina di Emanstraat / Hendrikstraat y ta evaluando un di cuatro parkeergarage. Ta buscando un espacio na final di caya grandi pa acomoda fluho di trahadonan. Tur e proyectonan aki ta forma parti di e plan total di BoAruba cu ta encera un renobacion di e producto Aruba y mehoracion calidad di bida di ciudadanonan di Aruba.