Kaminata pa rekoudá fondo pa Reuma Patiënten Vereniging Curaçao:

Willemstad- Sèptèmber – 2014: Resientemente a tuma lugá e kaminata’ ‘Walk 4 Reuma’. Esaki a kuminsá 7’or di mainta i a wòrdu organisá komo un evento pa rekoudá fondo pa partisipashon di algun miembronan di Reuma Patiënten Vereniging Curaçao na un kongreso tokante reumatismo. Alrededor di 1200 persona a forma parti di e kaminata aki, pues realmente por ser konsiderá un éksito rotundo. Subway ta masha orguyoso di por a kontribuí na e kaminata aki ku a konta ku partisipashon di hendenan ku sea tin e enfermedat, konosé un persona ku tin’é òf ta simplemente deseá di ta den moveshon rekreativo. Subway ta suprayá un bida salú i ta motivá su klientenan pa nan ta den moveshon konstante. Di akuerdo ku representante di Subway, loke ta duna kontenido na un aporte pa un evento manera esun aki ta e echo ku e ta wòrdu kombiná ku un bon kousa. Subway ta kere firmemente den esei. Esaki ta motibu sufisiente pa Subway pone skouder bou di e proyekto. Ademas di un kantidat di partisipante grandi ‘Walk 4 Reuma’ a konta tambe ku un total di 100 boluntario ku a hasi e kaminata posibel. Na final, Subway a duna tur boluntario un delisioso sèntwich p’asina sisti e stoma despues di un mainta bastante aktivo. Subway ta felisitá Reuma Patiënten Vereniging Curaçao ku un eksitoso kaminata i ta deseá nan hopi éksito den futuro. Pa mas informashon tokante di CurReuma por tuma kontakto ku Sra. Dafna Braam-Fontilus na 747-1884 or 694-7333 , presidente di e organisashon.