Willemstad – Minister Palm tabata na Colombia kaminda e la liderá un mishon komersial kual tabata tin mas di 25 empresario i representantenan di sektor privá di Kòrsou. Minister Palm a hiba kombersashon ku varios persona entre otro e Embahador di Reino na Colombia, Sr. Robert van Embden komo tambe Minister di Komersio, Industria i Turismo, su ekselensia Señora Cecilia Alvarez Correia. E kombersashon ku Minister Alvarez Correia tabata hopi ameno i konkreto i ela demostra un apoyo total na Kòrsou pa resolve e problematika di suministro di fruta, berdura i piská ku aktualmente ta den kontratiempo. Minister Alvarez Correia a duna tur sosten i a yama su funshonarionan pa forma un komishon chikitu ku ta bai atende e asuntu di suministro aki imediatamente i a instruí pa tene kontakto ku proveedornan i transportadonan na e siudatnan kosteño pa asina por kuminsa ku e kontakto entre empresionan di Kòrsou i esnan di e siudatnan na kosta. Minister Alvarez Correia ta un di e Ministernan mas respetá na Colombia. Den e gabinete Santos 1, e tabata Minister di Infrastruktura i Transporte i a keda rekonosé komo un super Minister. I awor ku e tin e batuta di Komersio, Industria i Turismo den Gabinete Santos 2 ta spera ku lo e bai hiba Colombia na un nivel mas haltu di kresementu. Minister Alvarez Correia a duna Minister Palm tur sosten i koperashon i a indika ku Korsou ta na su kurason ya ku su abuelo a nase na Kòrsou i su tata a biba na Kòrsou un tempu. Esaki tabata un notisia hopi grato ku ta hasi ku Kòrsou lo tin atenshon sigur di e minister importante aki. E entidat pa promove eksportashon, invershon i turismo PROEXPORT tambe a keda bishitá dor di Minister Palm i a keda palabrá ku ta bai traha huntu ku Ministerio di Desaroyo Ekonomiko i Sektor Privá di ambos pais pa atende puntonan di interes komun riba tereno di Komersio i Invershon. Minister Palm a presensiá firma di un akuerdo di koperashon entre e asosiashon di empresarionan Chikí i Mediano di Kòrsou ADECK i e asosiashon similar di Colombia Acopi. Tin hopi espektativa di parti di ambos organisashon pa koperá y fortifiká otro i tambe e kompromiso pa traha huntu pa mehorá posishon di empresarionan i kontribuí na kresementu ekonomiko di ambos pais. E 25 empresanan ku a partisipa na e Mishon Komersial tabatin nan manan yen ku sitanan di negoshi i pa algun di nan ya kaba e prome sitanan a duna nan tur e satisfakshon. E tres dianan di trabou na Colombia a genera mas di 150 sita di negoshi. E kulminashon di e mishon komersial tabata apertura di “Casa de Curaçao” ku ta un punto di kontakto pa empresarionan di Kórsou ku ke hasi negoshi ku Colombia i empresarionan di Colombia ku ke hasi negoshi ku Kòrsou.  “Casa de Curaçao” ta un Kámara di Komersio bilateral ku ta karga e number “Camara de Comercio e Integración Colombo Curazoleña” i ta habri pa tur empresario di tantu Kòrsou komo Colombia pa afilia i bira miembro i asina hasi uso di e fasilidatnan ku tin na Bogotá, Colombia. Gobiernu di Kòrsou a duna mandato pa habri representashon komersial na algun pais di importansha pa Korsou pa medio di Kamaranan bilateral of “desks” pa asina fasilitá e kontaktonan komersial pa e empresario di Kòrsou ku e respektivo paisnan. Ya tin un representashon na Brazil, i awor na Colombia. Proksimamente lo habri na Panama, Miami, Hulanda i China.