WILLEMSTAD – Preparashonnan pa Karnaval 2015 ta andando i pa aña 2015 grupo VaVaVaVoom Berria lo t’ei p’asina yuda engrandesé Karnaval 45. E di 45 edishon di Karnaval ta kos di selebrá en grande i p’esei grupo VaVaVaVoom Berria lo t’ei pa kontribuí den esaki. Djadumingu dia 7 di sèptèmber, durante un enkuentro na Saliña Galeries tabatin presentashon dje diferente diseñonan na miembronan di grupo VaVaVaVoom Berria. Dikon VaVaVaVoom Berria, pasó ‘Berria’ ta para pa algu nobo i inovativo. Karnaval 2015, grupo VaVaVaVoom Berria su tema lo ta ‘Paramitsha’, kual ta un diseño di trahe den kual e públiko lo por atmirá un eksploshon di koló ku ta kulminá den diseñonan úniko, for di kual union i un sintimentu real di alegria i goso ta brota, den trahenan akabá ku detaye i aksento, manera semper grupo VaVaVaVoom a sa di presentá den pasado.  VaVaVaVoom Berria lo konsistí di un sekshon di profeshonalnan hóben, siguí pa e sekshon di individual, kualnan lo bai ta trahenan kada unu diferente, pues úniko den nan estilo i despues e sekshon general. Grupo VaVaVaVoom Berria ainda tin un kantidat limitá pa esnan ku kier forma parti dje ambiente karnavalesko huntu ku nan. Esnan interesá lo por tuma kontakto ku Xenah na numbernan di telefòn 5265656 òf 6837542.