Willemstad – Dia 6 di sèptèmber ku a pasa JCI IOBA Curaçao huntu ku e 12 partisipantenan di e workshop empresarial a partisipá na e feria mensual di AKV. Na final di e feria sra. Mariela Romero, representante di MCB  a hasi entrega di sertifikadonan na e partisipantenan komo parti final di e workshop. E enfoke di e aña aki di e proyekto Home Farming Tera Krioyo ta pa eduká e komunidat di Kòrsou tokante e benefishinan di planta nan mes fruta i berdura pero tambe krea oportunidatnan pa stimulá e desaroyo empresarial den e sektor agrario. Esaki a hasié den forma di ofresé workshopnan básiko i un workshop empresarial. E temanan ku a keda trata na e workshop empresarial ta: Plan di negoshi, Plan di merkadeo i e parti práktiko kaminda e partisipantenan a haña chèns di tèst tur loke nan a siña den un ambiente  chikí. E parti práktiko a tuma lugá na AKV durante nan ban topa, i e trainer nan tambe ta tei presente pa a duna feedback na e partisipantenan. “Best local community empowerment program” Kòrsou ta dependé di produktonan importá riba un gran eskala. Mayoria di produktonan pa nos kuminda diario tambe ta importá. Kualke krísis di kuminda riba un nivel internashonal lo afektá Kòrsou. Ta p’esei nos tin ku kuminsá traha riba redukshon di nos dependensia di alimentonan importá i asina redusí tambe nos vulnerabilidat. E patrosinadó prinsipal di e proyekto ta Maduro & Curiel’s Bank. JCI IOBA Curaçao ta un organisashon boluntario ku ta traha pa trese kambio positivo den komunidat dor di ofresé personanan entre 18 pa 40 aña oportunidat di desaroyo. Pa logra e mishon aki e organisashon mester di partisipashon di henter komunidat. Tambe JCI IOBA Curaçao lo ta kontribuyendo na e meta number 1 di e “United Millennium Development Goals” (UNMDG) definí pa Nashonnan Uni, kual ta kombatí pobresa i hamber rònt mundu y number 7 kual ta trese kambio duradero pa nos medio ambiente. Pa mas informashon por tuma kontakto ku e komishon enkargá via ioba.terakrioyo@gmail.com  / 670 50 27.