Ku finansiamentu i koperashon di Skanfonds, Oranje Fonds i Fonds voor Cultuurparticipatie di Hulanda, den luna di òktober próksimo Sentro Kultural Kòrsou ta kuminsá ku su proyekto “Promé Paso den Muzik” den barionan di Kòrsou. Ta trata di un proyekto pa yuda desaroyá habilidat i talentonan musikal serka nos hóbennan den bario. Via di e proyekto aki hóbennan di entre 8 pa 14 aña di edat ta haña e oportunidat, pa den grupo, risibí lès di formashon di muzik i alabes siña toka un instrumènt musikal. E proyekto “Promé Paso den Muzik” ta forma parti di e proyekto “Kinderen Maken Muziek” di Hulanda ku a keda inisiá na aña 2011 na okashon di selebrashon di 40 aniversario di su Mahestat Reina Maxima. Estudionan a demostrá, ku muzik ta sostené tur proseso di edukashon i enseñansa. Prinsipalmente serka hóbennan esaki ta un estímulo positivo pa nan dediká nan tempu den aktividatnan positivo. Muzik ta stimulá konsentrashon, ta krea disiplina i konfiansa propio, e ta fomentá un bon komunikashon i yuda desaroyá otro habilidatnan soshal serka nos hóbennan. Den kuadro di esaki Sentro Kultural Kòrsou a tuma e inisiativa pa kuminsá e proyekto aki pa por fasilitá hóbennan den bario, ku pa un motibu òf otro no por paga lèsnan di muzik, e posibilidat pa nan por haña lès di muzik i siña toka un instrumènt.
Sentro di Bario
E proyekto Un Paso den Muzik lo tin un durashon di 2 aña, den kual e hóbennan lo kuminsá den e promé aña ku lèsnan di formashon musikal i di blòkflùit. Den e di dos aña e hóbennan lo hasi eskoho di e instrumènt ku nan ta deseá di siña toka. Den e fase inisial di e proyekto ta kuminsá duna lès den Bario di Tera Kòrá, Barber, Soto i Wishi/Marchena. E lèsnan ta na enkargo di dosentenan di Akademia di Músika Edgar Palm (CCC) i ta keda duná un biaha pa siman den e respektivo Sentronan di Bario i na Fundashon Kultural Banda Bou. Tur hóben interesá por registrá na un di e Sentro di Bario ariba menshoná. Hóbennan di área di Barber por tuma kontakto ku señor Rudy Rooi òf Elfrin Basilio na telefòn 560-9763 òf 523-5290. Kosto di inskripshon ta únikamente 10 florin pa mucha pa aña i e lèsnan mes ta grátis. Ultimo fecha pa inskribí ta 27 di sèptèmber 2013.
Kinderen Maken Muziek: un forma di koperashon úniko
Kinderen Maken Muziek di Hulanda ta inisiativa di Oranje Fonds i Fonds voor Cultuurparticipatie. Meta di organisashonnan aki ta pa duna sosten na inisiativanan soshal pa promové kultura bou di komunidat. Skanfonds ta yuda finansiá parti di e programa aki. Skanfonds ta un fondo nashonal di Hulanda ku ta duna sosten na hendenan den situashon difísil. E ta duna sosten na inisiativanan ku ta duna e ser humano speransa i perspektiva nobo den bida i den komunidat. 
“Nos ta realmente honrá di kontentu ku e finansiamentu ku nos a risibí di Skanfonds, Oranje Fonds i Fonds voor Cultuurparticipatie. Via di e proyekto Promé Paso den Muzik nos ta konvensí ku nos por yuda alehá algun di nos hóbennan for di riba kaya i duna nan un hèrmènt pa nan por sigui desaroyá nan mes den un forma positivo. Ta probá ku via di kultura, arte, deporte i muzik, nos ta fomentá hóbennan positivo den nos komunidat”, señor Elvio Cijntje, Presidente di Sentro Kultural Kòrsou a deklará.