WILLEMSTAD- 19 ougùstùs  2013:- Di akuerdo ku informashon di imigrashon ku Curaçao Tourist Board (CTB) ta kompilá por anunsiá ku durante di luna di yüni e sifranan preliminario ta mustra ku 32,944 turista di estadia a yega Kòrsou, esaki ta 5% mas tantu ku e mesun temporada aña pasá. Na 2012 esaki tabata 31,317 durante e mesun luna. Kantidat di bishitante for di Nort Amérika a mantené igual ku den luna di Yüni aña pasá  ku ta 6,192 for di e region aki. Sifranan di bishitante for di Merka (US) a registrá 0% ku ta ekivalente na 5,973, Canada na su turno a registrá un kresementu di 10% pa e luna di Yüni 2013. Merkado di Sur Amérika a oumentá ku 4% den luna di Yüni 2013, ku un total di 9,398 bishitante kompará ku 9,066 den 2012. For di Venezuela un total di 5,882 bishitante a keda registrá, esaki ta un kaida di 5%. Di akuerdo ku CTB, e kaida aki ta un efekto direkto di kanselashon di buelo nan DAE for di 15 di Mei 2013, anteriormente no a sinti efekto ya ku e promé dos simannan di Mei 2013 tabata positivo kompará ku e mesun temporada di aña pasá. Pa lokual ta trata sobra pais nan den Sur Amérika, Sürnam i Colombia a registrá un oumento den bishitante, esakinan ta 54% i 31% respektivamente. Den sifranan apsoluto e paisnan sekundario den Suramérika a registrá 924 i 1,243  turista di estadia. Merkado di Oropa a registrá 0% den Yüni 2013; e merkado aki a trese un total di 11,872 bishitante pa Kòrsou. E pais ku usualmente ta pèrkurá pa un mayor kantidat di turista, Ulanda– e luna di Yüni ta konosé un kaida di 2%. Pa luna di Yüni nos ta risibí 9,418 bishitante for di Ulanda, kompará ku 9,589 den 2012. Alemania a kai registrando 2%, ekivalente na 928 bishitante, aña pasá esaki tabata 943. ‘Stay Over’ di den Karibe a subi ku 21% den luna di Yüni. E bishitante nan for di Aruba a subi ku 9%, ekivalente na 1,953. For di Repúblika Dominikana ta risibí 585 turista, ekivalente na un kresementu di 100%.

Sifras nan “Year to Date”

E promé 6 lunanan di aña 215,447 turista di estadia a bishitá Kòrsou. Aña pasá CTB a registrá durante di e mesun periodo 202,137 turista di estadia. Esaki ta un kresementu di 7% kompará ku e sifranan di 2012; den sifranan apsoluto e kresementu registrá ta ekivalente na 13,310 turista mas tantu ku e aña anterior. Region di Nort Amérika a krese ku 3% durante di e promé 6 lunanan di 2013. Un total di 39,462 bishitante for di e region aki a keda registrá. E region di Sur Amérika a krese ku 19%, te ku e luna di Yüni 2013, un total di 60,532 turista for di e region aki a bishita Kòrsou kompará ku 50,984 na 2012. Karibe tambe ta oumentá na sifra di bishitante, registrando 18,630 kompará ku 18,462 di aña pasá mesun temporada. Aki ta mira un kresementu leve di 1%. Kontinente Europeo a registrá 3% ménos ku aña pasá durante di e promé 6 lunanan di aña, den sifra apsoluto esaki ta 87,240 kompará ku 90,108 di 2012. E kantidat di anochinan ku turistanan a hospedá na Kòrsou ta registrá un kresementu leve di 1%. Tur huntu por hasi menshon ku turistanan a hospedá 1,821,780 anochi na Kòrsou, esaki durante di e promé 6 lunanan di 2013. For di region Nort Amérika e sifranan a disminuí ku 3%. Bishitante nan di Sur Amérika, sí a oumentá nan anochinan na Kòrsou, esaki ta konosé un kresementu di 10%. Pa Karibe tambe tin un kresementu registrá di 1% durante di e mesun periodo. Kontinente Europeo ta registrá 5% ménos anochi ku aña pasá e mesun temporada.