Willemstad, Djasabra 16 i djadumingu 17 di ougùstùs lo bai tin un konsierto di e hóben Shenyo Bokshoven na La Tentashon. Esaki lo tuma lugá 8or di anochi i ta kosta solamente Nafl. 15,-. Jesushen “Shenyo” Bokshoven ta un hóben sumamente talentoso ku ya a profilá den diferente área di arte. E ta un aktor, kantante i kompositor. Shenyo a kuminsá ta kanta na aña 2004 den e grupo pumpulunchi. Na aña 2005 te ku 2008 e la partisipá na Festival di Tumba Hubenil i despues e la sigui na aña 2010 partisipando den Festival di Tumba 2010. Den e aña aki tambe e la partisipá na Un Kanto pa Kòrsou, na unda e la Sali na di tres lugá ku e kansion “Soño di un hóben”. Aparte di ta kanta e hóben talentoso aki ta komponé kantika tambe. E la komponé su promé kansion na aña 2008, kual yama “Bida ta un biahe”. Asina aki Shenyo a sigui komponé tumba pa partisipantenan di Festival di Tumba Hubenil na aña 2013 i 2014. E aña aki e ta kumpli 10 aña komo kantante. Shenyo ta bai selebrá esaki ku pueblo di Kòrsou den gran forma. Dia 16 & 17 ougùstùs e ta bai tin su propio konsierto, yama Shenyo in concert “A wish come true”. Durante e konsierto lo bai tin presentashon di diferente guest stars manera Reinier Lijfrock, Rudbern Pablo, Deja Vu Dancers, Grupo Zjazjimei i hopi mas. E anochi aki lo ta kargá ku kanto, baile i aktuashon. Shenyo lo deleitá e públiko ku diferente piesa i entre nan su single ku ta hit na momentunan aki na radio “Despedida”. E single aki a wòrdu komponé pa Ikey Jesurun i a wòrdu dediká na tur bekadonan. Manera bosnan mes por mira ta trata aki di un hoben sumamente talentoso, i por spera un show na nivel. Teatro Luna Blou & La Tentashon ta invitá hinter pueblo di Kòrsou pa bin disfrutá i sostené e hóben Shenyo Bokshoven den e konsierto “A wish come true”. Karchinan ta kosta solamente Nafl. 15,- i ta optenibel na takia di Teatro Luna Blou , Time to Time (Saliña), Visam Tours i Servei (Sta. Maria). Pa mas informashon tokante di Shenyo in concert “A wish come true”. Chek nos página wep: www.lunablou.com, por yama na 462-2209 òf por chek nos Facebook: Teatro Luna Blou òf La Tentashon.