Djadumingu awor, 17 di ougùstùs,  ta konmemorá  e echo ku 219 aña pasá a tuma lugá na Kòrsou e gran rebelion di katibu bou di liderato di Tula i su kompañeronan. Ta e fecha ku Gobièrnu di Kòrsou na 1984 a proklamá ofisialmente komo “Dia di lucha pa libertat”. E aña aki atrobe Asosiashon Promoshon Konsenshi Istóriko i Plataforma Sklabitut i Herensia di Sklabitut,  ta organisá un grandioso konmemorashon na Parke Lucha pa Libertat na Ref riba: Djadumingu  17 di ougùstùs di 7 o’r pa 10 or’ di anochi Lo tin un programa kultural hopi variá ku Chosen Stars, Sorandy St. Jacobs, Niña Feliz, Poetic Colors, Kreadanza, SKOBA, Youthful Spirit i Grupo Karabela. Tur esaki kombiná  ku presentashon di teksto i fragmentu di e akontesimientunan di e rebelion di 1795 i abolishon di sklabitut. E aña aki e konmemorashon ta den kuadro di e lema: 1795: LUCHA PA LIBERTAT! 2014: PATRIOTISMO, YABI PA KONSTRUKSHON DI NOS NASHON Ku e lema aki nos ke ekspresá ku na 1795 katibunan mester a lucha pa logra nan libertat, ku  a nifiká un paso grandi riba e kaminda largu di emansipashon di nos pueblo. Awor na 2014 nos tin ku sigui lucha duru pa konstrukshon di nos nashon Kòrsou. Pero esaki no por logra si nos no traha riba nos patriotismo, komokiera ku esaki ta e yabi pa desaroyo di nos nashon. Inspirá pa e lucha di Tula nos ta bolbe invitá pueblo pa ban konmemorá viktoriosamente i ku firmesa: “Dia di Lucha pa Libertat”, Djadumingu awor, 17 di ougùstùs, na Parke Lucha pa Libertat na Ref. Na nòmber di A.P.K.I. i Plataforma Sklabitut i Herensia di Sklabitut, Drs. Frank Quirindongo