Durante e ya tradishonal enkuentro ku representantenan di medionan di prensa i amigunan di Fundashon Bon Intenshon, ya den fase di ‘countdown’ pa CNSJF na World Trade Center, por a nota hopi entusiasmo i positivismo pa selebrashon di promé lustro di e magno evento. Bosero di Fundashon Bon Intenshon, Percy Pinedo, a yama tur invitado bon biní i a pasa palabra pa Gregory Elias, kende a gradisí prensa pa e valioso trabou di informá komunidatnan lokal i internashonal di preparashon i desaroyo relashoná ku Curaçao North Sea Jazz Festival. Mas aleu Elias a informá esnan presente ku huntu ku su amigu Jan Lagendijk i algun empresario di e área di Pietermaai Smal, ya pa algun tempu el a bin ta traha riba konsepto di un festival nobo pa Kòrsou.  Ku orguyo el a anunsiá ku nòmber di e festival ta Curaçao BlueSeas Festival. “Nos ta pensá tene e festival aki sea previo na Curaçao International Film Festival Rotterdam òf djis algu despues di e festival di sine, Festival den e área di Pietermaai Smal. Ku Curaçao BlueSeas Festival nos ke ofresé bishitante i nos hendenan lokal músika estilo Blues di un nivel hopi haltu. E artistanan e Festival ta di taya mundial. Pa e evento aki tambe nos lo hasi un yamada riba e ret di kontakto i ekpserensia di nos amigunan di Mojo Events i muy en espesial e konosementu di mi amigu Skal di ‘Mojo’, ” Elias a bisa. Pa loke ta CNSJF mes un biaha mas e programa ta feature un line up artístiko variá i super interesante.   Durante e último fin di siman di ougùstùs e tres esenarionan na Curaçao World Center lo brinda tarima na artistanan rekonosé rònt mundo pa nan talento i produkshonnan. Riba djaweps 28 di ougùstùs, lo tin un unikùm ora ku Metropol Orkest di Hulanda lo rindi homenahe na e konosido músiko / kompositor  Rignald Recordino. E orkesta lo kompaña un seri di kantante riba e tarima Sam Cooke, kende nan lo interpretá komposishonnan di Recordino. Vosero Percy Pinedo a informá ku pa e espektákulo aki ya no tin karchi mas i ku pa e gran interes entre e tantísimo hendenan ku no a logra haña un karchi lo transmití e show ‘real time’ riba pantayanan grandi na Plasa Brion. Tambe a anunsiá ku e aña aki lo tin artistanan internashonal ta presentá riba djamars  26 na Ginger Café den Nieuwestraat. Riba djarason e konosido kantante José James lo presentá ku su banda na Brakkeput Mei Mei. Espektativa pa e show aki tambe ta hopi grandi komo ku José James mester a presentá aña pasá, pero mester a kanselá riba dia di e show pa motibu di un problema ku a surgi na su oïdo na momento di hasi chekeo d zonido. Sigmundi Jansen, kende tan a kabes di organisashon enkargá ku benta di karchi, di su parti a anunsiá ku benta di entrada ta bayendo bon. “E hecho ku nos ta hañando informashon ku okupashon di kambernan di hotèlnan ta hopi haltu ta duna nos un satisfakshon grandi. E aña aki via e página di CNSJF riba e plataforma Facebook nos a informá di apartamentunan kaminda bishintantenan por hospedá durante e siman. E reakshon i interes pa hospedá den apartamentunan tambe ta haltu, ku sin mas ta di balor agregá pa CNSJF komo e kantidat di kamber den hotèlnan ta limitál,” según e konosido empresario Jansen. Despues di e anunsionan positivo a Fundashon Bon Intenshon a pidi e invitadonan pa keda un ratu pa kòmbersá, interkambiá  di idea i pasa un ratu ameno ku otro. Sin duda un anochi ku a duna indikashon ku nos tan a víspera di otro Curaçao North Sea Jazz Festival históriko. —www.curacaonorthseajazz.com