Willemstad,- Djadumingu 10 di ougùstùs pa 8or di anochi La Tentashon ta presentá Lesami, un Guerra di Chiste. Esaki lo wòrdu presentá dor di Abigahie “Abi”Pinedo, Edion “Loloi” Booy i Donovan “Slim” Benett. Pa di dos biaha, La Tentashon ta organisá Lesami. Un anochi kaminda aktornan konosí den mundu di teater na Kòrsou ta bai kompetí ku otro den kontamentu di chiste. Biaha pasa Lesami tabata tin un tremendo éksito. I e aña aki La Tentashon ta bolbe organisá esaki pa tur ku ta gusta hari i ku ta gusta un bon chiste. E aktornan ku ta bai mustra nan abilidat den kontamentu di chiste e aña aki ta Abigahie “Abi” Pinedo, Edion “Loloi” Booy i Donovan “Slim” Benett. Abigahie Pinedo ta un eks-studiante di La Tentashon Performing Arts Academy i studiante di ArtEz-Arhnem na Hulanda kaminda e ta hasiendo su estudio pa dosente di teater. E hóben aki ya ta konosí komo aktris di diferente produkshonnan lokal di La Tentashon i awor ta profilando komo dosente di teater di diferente produkshonnan ku a ser presentá resientemente na La Tentashon. Edion Booy mihó konosí komo Loloi tambe ta hopi konosí den e mundu di teater. Edion Booy a hunga den komedia manera Loloi na port’i snek, Bululu riba ruta di Karnaval i Mal Moda Mal Manera i ta konosí pa su abilidat di buta públiko hari. Huntu ku e dos aktornan aki lo bai tei e hóben aktor i kantante Donovan “Slim” Benett. Donovan Benett tambe ta un hóben ku a partisipá den diferente produkshonnan di La Tentashon, manera Hudas, Krusada, Bida Hoben Bida Fasil…djis pa menshona un par. Manera bosnan por mira ta tres aktor di taya ta bai tei e anochi aki pa entretené públiko presente. Nan ta bai buta públiko hari te yora, tin hasta oportunidat pa hari i lora abou. Pues no pèrdè e oportunidat aki pa bin distraí e mente i hari hari hari i sigui hari. Kumpra bo karchi awe mes na balor di Nafl. 15,-. Karchi ta optenibel na takia di Teatro Luna Blou, na Time to Time (Saliña)i na Servei (Sta. Maria). Pa mas informashon tokante di Lesami. Chek nos página wep: www.lunablou.com, por yama na 462-2209 òf por chek nos Facebook: Teatro Luna Blou òf La Tentashon.