Willemstad, Djaluna 4 di ougùstùs Teatro Luna Blou & La Tentashon en koperashon ku Banco di Caribe, ENNIA, Refineria Isla i CultuurA a hasi apertura di Dutch Caribbean Youth Art Festival 2014. Dutch Caribbean Youth Art Festival ta un interkambio kultural artístiko na unda ku ganadónan di diferente kompetensha rònt reino ta bini huntu pa krea un show. E paisnan ku ta partisipá e aña aki ta Kòrsou (Luna Yen), Boneiru (Bonaire Youth Talents Competition, Aruba (Gang di Arte), Hulanda (Kunstbende), St. Maarten i St. Eustatius (Windwards Talent Competition). E anochi a habri ku animashon di DJ Carlito, ku a sá di buta un tremendo ambiente na La Tentashon i un presentashon di baile ku koreógrafia di Remses “Muis”Rafaela. Durante e show prinsipal e hóbennan di Kòrsou, Boneiru, Aruba, Hulanda, St. Maarten i St. Eustatius a duna diferente presentashon di kanto, baile i deklamashon di poesia. E anochi a wòrdu será ku e reinan di ambiente “Gio Fuertisimo”, ku a deleitá esnan presente ku nan repertorio. Tabata un anochi tur afó, kaminda tur esnan presente a disfrutá un bòl. Djarason anochi tabata tin presentashon di rèp, baile, kanto i diferente mas. Tambe tabata tin presentashon di e hóbennan di St. Eustatius i Aruba- tambe di grupo di baile Krea Dansa. Tin e oportunidat pa kumpra e karchi di miembresia di Teatro Luna Blou & La Tentashon pa solamente Nafl. 65,-. Esaki ta enserá ku bo ta drenta henter e aktividat di DCYart Festival grátis i bo ta risibí deskuento riba e diferente produkshonnan di Teatro Luna Blou & La Tentashon durante un aña largu. Pa mas informashon tokante di e programa di Dutch Caribbean Youth Art. Chèk nos página wep: www.lunablou.com, por yama tambe na 462-2209 òf por chèk e Facebook: Teatro Luna Blou òf La Tentashon.